孫興民即將進軍美職。(Getty Images)
正隨熱刺喺南韓集訓嘅孫興民，周六(2日)宣布將會離隊後，據報同FC洛杉磯火速達成轉會協議，呢位33歲前鋒將成為美職第3高薪球員。熱刺放走隊長孫興民後，左翼位置亦會迎嚟重磅收購，消息指熱刺已加速斟介皇家馬德里嘅洛迪高高斯。
孫興民早前收到沙特球會同FC洛杉磯斟介，佢就屬意去美職發展，著名記者Ben Jacobs報道，FC洛杉磯同孫興民、熱刺已傾掂數，轉會費為2,000萬美元，870萬美元年薪超越布斯基斯，成為美職第3高薪球員，僅次於美斯同恩斯治尼。孫興民喺FC洛杉磯亦會同前熱刺隊友洛里斯重逢。
熱刺今晚(3日)會喺首爾對戰紐卡素，極可能會係孫興民最後一次代表熱刺上陣，熱刺同亞洲之行主辦單位有合約規定，孫興民必須喺「南韓站」上陣，預計等今場熱身賽後就可以正式官宣。熱刺依家有馬菲斯泰爾同威爾遜奧度拔可踢左翼，但「老孫」離隊亦為新收購開綠燈。
據西班牙《阿斯報》報道，熱刺放走孫興民後，騰出大量薪酬空間，並已鎖定巴西國腳洛迪高高斯為頭號目標，佢嘅速度、技術同單對單能力，都有孫興民全盛期嘅影子，而佢喺沙比阿朗素執教後已失去主力位置，報道指皇馬索價7,800萬鎊，利物浦如收購阿歷山大伊沙克失敗，亦準備加入戰團，所以熱刺希望速戰速決。
本文作轉載及備份之用 來源 source: http://hk.on.cc
|
鍾意就快D Share啦！
|
|
|