修夫基(左)可能取代魯賓艾摩廉(右)，成為曼聯新領隊。(Getty Images)
曼聯開季後頹勢未止，唔只首2場英超失分，上場英聯盃第2圈更加被乙組仔甘士比淘汰，紅魔鬼將於周六(30日)晚10點英超主場對般尼，領隊魯賓艾摩廉出席賽前記者會，透露自己前途仍屬未知之數，承認有時想辭職。英國傳媒分析指，一旦呢位葡萄牙少帥離隊，前英格蘭國家隊主帥修夫基最大機會接任。
曼聯喺英聯盃恥辱性出局後，令魯賓艾摩廉備受下台壓力，據悉踢完對般尼嘅聯賽之後，佢將會同球會高層舉行談判。賽前傳媒問佢周末過後，會唔會仲係曼聯領隊，佢話：「我唔知會發生咩事，唔可以作出任何承諾。」
雖然艾摩廉稱短期內，曼聯帥位唔會改變，但唔排除辭職可能：「我有時會憎恨(曼聯)球員，有時喜歡及維護佢哋，有時想辭職，有時想留隊20年。」英超完成今周賽事後，將進入國際賽期，曼聯有2星期空檔，據悉艾摩廉將會同球會高層進行一次詳細會談，雖然有傳管理層仍希望挽留佢，但如果周六(30日)晚輸畀般尼，情況可能改變，尤其是國際賽期後，曼聯將連接惡鬥2支勁旅曼城、車路士，如果繼續由艾摩廉領軍，好大機會輸晒呢2場大戰。
近日已傳出多位曼聯新帥人選，現時修夫基成為大熱，早於紅魔鬼聘請艾摩廉執教之前，曾計劃邀請呢位54歲名帥執教，佢上年辭去英格蘭國家隊領隊之位後，未有新教職，可以隨時接掌帥印，啱晒要緊急換帥嘅曼聯。
本文作轉載及備份之用 來源 source: http://hk.on.cc
|
鍾意就快D Share啦！
|
|
|