阿仙奴兩位後備奇兵做英雄。(Getty Images)
歐聯聯賽階段周三(17日)凌晨展開，上屆4強阿仙奴旗開得勝，作客2比0擊敗西甲嘅畢爾包。阿仙奴今場贏得艱苦，多得領隊阿迪達後段「神調動」，由兩位後備奇兵加比爾馬天尼利同李安度杜沙特互相傳射入波致勝，令阿仙奴喺歐聯連續6次擊殺西甲球隊，創造新紀錄。
阿仙奴今場續有布卡約沙卡、馬田奧迪加特同威廉沙列巴等傷兵缺陣，面對主場氣勢驚人嘅畢爾包，上半場未有太大優勢，約基利斯一射一頂都無功而還。踢到71分鐘阿迪達作出關鍵換人，派出馬天尼利入替伊比爾治伊斯，36秒後佢就接應另一後備兵杜沙特妙傳，單刀射入打破僵局。
好氣好力嘅馬天尼利繼續衝擊畢爾包防線，87分鐘左路硬爆落底線，投桃報李助攻杜沙特射成2比0，助阿仙奴全取3分。馬天尼利落場36秒入波，係阿仙奴歐聯史上後備最快入球紀錄，而兩名後備球員互相助攻入波，亦係阿仙奴歷來歐聯第1次出現。
阿仙奴夏天增兵特意加強板凳深度，阿迪達一直強調入替嘅球員稱呼為終結者( Finisher)而唔叫「後備」，表達對球員嘅重視，佢賽後表示：「我哋經常討論『終結者』點樣去改變比賽，馬天尼利同杜沙特做得好好，終結者可能比正選更重要，漫長球季我哋需要所有球員。」
阿仙奴近2屆歐聯成績穩步上揚，前屆打入8強，上屆殺入4強，期間更連續6次擊敗西甲球隊，包括前屆分組賽雙殺西維爾(2比0、2比1)、上屆聯賽階段贏基羅納2比1、8強雙殺皇家馬德里(3比0、2比1)，同埋今場2比0贏西維爾，係歐聯史上第1支對西甲兵6連勝球隊，而佢哋喺第3輪仲會對馬德里體育會。
本文作轉載及備份之用 來源 source: http://hk.on.cc
|
鍾意就快D Share啦！
|
|
|