打風落雨？唔使驚，話說謝霆鋒近日廣州開騷，貴人出門自然招風雨，點知佢一嗌「謝停風、謝停雨！」尾場居然真係停風停雨，「停風力場」真係唔講得笑！
講開又講，近排霆鋒真係冇停手，踩過界拍麥當勞微電影，飾演香港首間老麥經理，睇片見到佢着住復古制服教員工用手揸漢堡包，個場仲要神還原幾十年前街景，還原咗一代人嘅集體回憶，唔少網民睇到眼濕濕。
今次霆鋒依然係招牌Chok，但又Chok得恰到好處，佢已經唔係後生嗰陣嘅刻意耍帥，而係一種舉手投足自然流露嘅氣場，冇比較冇傷害，有網民出片拎謝霆鋒、陳冠希、吳彥祖呢批千禧男神比較，Edison早就老態龍鍾變咗潮牌大叔，吳彥祖仲頭痕，M字額好快拍得住蘇民峰，唯獨霆鋒個樣同廿年前比只係多咗幾分男人味，皺紋都唔多條，如果鋒味出埋防腐劑，一定大賣特賣。
其實霆鋒條路唔係順風順水。後生嗰陣由「頂包案」到感情事，邊樣唔係被網民插到開花？但人哋真係有Guts，由《綫人》攞金像影帝到《鋒味》煮出國際，今時今日講霆鋒，十個有九個都係正評，話佢「愈老愈有味道」，呢種由負轉正嘅傳奇，唔係個個明星做到。
反觀依家啲新晉偶像，Hea吓跳吓就當交貨，難得粉絲仲要盲撐話「已經好努力」。唔該學吓前輩啦，人哋霆鋒仲差幾年就「入五」，都仲肯搏命開全場雨中演唱會，廿幾歲仔行兩步就氣喘喘，仲好意思話係亞洲第一？
話時話，家陣超強颱風「樺加沙」打到應，希望今趟有「謝停風」神力加持，個風急急腳走佬啦。
本文作轉載及備份之用 來源 source: http://hk.on.cc
|
鍾意就快D Share啦！
|
|
|