許紹雄和太太龍嬿而，除了許惠菁（Charmaine）之外，其實兩人還有龍嬿而與前夫的一名兒子。許紹雄也視與已出，十分愛錫他。在早前許紹雄接受《香港01》專訪時，他就曾透露自己追求太太龍嬿而的經過，及對她的愛意。
許紹雄說：「我嗰時識係朋友介紹。（一見鍾情？）又未至於一見鍾情，哈哈，係咁樣識嘅。（主動追，你太太後生好靚女！）係好靚嘅。鍾意嘅時候就去追㗎啦，個天安排咗係咁就係咁囉。（用咩殺手鐧去追？）冇喎，冇咩殺手鐧。（追咗幾耐？）幾耐呀？幾年囉。（追喎，唔係拍拖！）追好快㗎，唔記得啦。」
他續說：「嗰時去呃錢，好興去新加坡登台，總之有劇就可以去登台。（點追？死纏爛打？）又唔係，唔知呀⋯⋯佢唔夠運囉，哈哈哈！佢盲嘅。（太太當時有小朋友。）幾好㗎，而家我哋兩父子都好好傾，佢而家喺澳洲都成日打電話返嚟。（當初有冇隔膜？）冇㗎。佢個仔嗰時幾歲。（唔介意？）介乜意啫，你唔好鍾意人，鍾意人就介乜意啫。」他更反指記者思想守舊：「你唔好咁苦惱先得㗎，外國幾多人啲小朋友完全係領養。冇人叫佢，佢自動叫我做老竇嘅。」
本文作轉載及備份之用 來源 source: http://www.hk01.com
|
鍾意就快D Share啦！
|
|
|
