一對新人接受訪問時，徐浩坦言：「我喊得多過佢。今朝接新娘會講一段愛的宣言，跟住我喊到要停，趴埋喺個櫃度，跟住先講完，同埋都係喊住咁講。你聽到幾多成呢？」曾樂彤笑言：「我聽到嘅，但係你再睇返條片，如果唔係我嘅話，應該完全聽唔明講咩，即係好似講外星文咁。」徐生徐太果然非常有默契。
曾樂彤也表示，平日與老公徐浩各自因工作關係而少見面，所以都會非常珍惜相處的時光。「可能佢做完嘢返嚟已經凌晨，第二朝我又出去，所以相處時間好珍貴。有時返嚟屋企時候，我會幫佢準備好清潔用品，例如毛巾。我又好唔鍾意抌垃圾，唔使我講，佢又會幫我做晒呢啲我唔鍾意做嘅嘢，所以喺愛的宣言入面都會提到呢啲小細節。」
講到「玩新郎」環節中有一個搵出新娘「眼耳口鼻」的拼圖遊戲。曾樂彤大讚徐浩極速搵到，徐浩就講出肺腑之言：「我係一望就望到。一個人雙眼咁靚，係好易認㗎！（最靚五官砌埋就係？）係呀、係呀！」曾樂彤又說：「我諗我砌返你都好快，我未見過啲咁完美嘅男人。」
問到何時會製造「愛情結晶品」？曾樂彤表示：「個結晶品就係我哋嘅作品。」徐浩則說：「好悶呀呢個答案，你睇佢哋靜晒。」有記者問：「會唔會有啲郁得嘅？」徐浩直言：「我覺得BB唔係話你想要就一定有，係上天賜嘅禮物，真係到嘅時候就欣然去有結晶品。」記者又說：「都要不設防。」徐浩回答：「有時設防都會嘅。」曾樂彤笑言：「呢個係常識題嚟㗎喎。」又問：「會唔會有計劃地進行？」曾樂彤回答：「就係有計劃地唔進行。」記者：「今晚安靜咁過？」曾樂彤再補充：「應該點樣講？」徐浩：「即係設防地忙碌。」曾樂彤坦言：「好赤裸呀。」對答十分之爆笑。
本文作轉載及備份之用 來源 source: http://www.hk01.com
|
鍾意就快D Share啦！
|
|
|
