「童顏女神」羅毓儀與林俊其在戀綜配對成功，兩人已火速見家長，並視對方為結婚對象。林俊指會努力搵錢、包辦家頭細務，免女友入廚房，就連對方的地獄料理都樂意照啃，認真絕世好男友。
藝人羅毓儀（Yuki）與林俊其（Kris）因無綫戀綜《女神配對計劃》而變為真情侶，兩人近日一齊整蛋糕實行甜上加甜。Kris可算是小廚神，自小已對烹飪有興趣，之前曾在節目中為Yuki親製蛋糕，Yuki剛好相反，她自爆在維也納讀書時曾炮製地獄料理「三色豆螺絲粉」，情人眼裏出西施的Kris謂：「我未試過佢嘅手勢，佢求其煮碗麵畀我，我已經好開心，好想試佢嘅三色豆螺絲粉，畀我感受吓。」又揚言將來毋須女友入廚房，自己可包辦煮飯及洗碗：「以後等我做，我唔想見到佢辛苦。」
兩小口拍拖至今近3個月，進展神速，早在個多月前已互見雙方家長，並順利過關，Kris指當日媽媽對Yuki非常殷勤，不停為她夾餸，又大爆媽媽一直在背後助攻：「節目播出時媽咪唔喺香港，佢打咗一篇長文又錄音同我講，話Yuki係好女仔，叫我唔好咁收理自己，後來知道我哋拍拖，父母都好開心。」至於Kris跟羅父相當投契，Yuki稱父母也大讚Kris乖仔。
而兩人亦早已視對方為結婚對象，Kris透露早在錄影戀綜時已認定對方，承諾會為將來而努力賺錢：「希望呢段關係發展得更好，我都有出去搵其他工作幫補，有做剪片工作。」Yuki就指不介意對方人工高低，認為最重要有上進心：「我哋好早有傾過結婚問題，大家都想向住呢個方向，但現時想喺事業上紮實啲先。」兩人有意合作出歌及拍情侶Vlog，並期待在電視上合作，問到若演情侶會否感尷尬？Yuki笑言：「我哋係專業演員，拍親密戲唔會尷尬，投入角色就可以。」至於會否介意對方跟別人演親熱戲，她大方說：「唔介意，冇理由因為感情而妨礙大家工作，大家有工作當然會戥對方開心。不過拍之前一定要講聲。」
場地：Bakebe
本文作轉載及備份之用 來源 source: http://hk.on.cc
|
鍾意就快D Share啦！
|
|
|
