宏福苑去年11月大火燒毀無數家園，在宏福苑長大的謝安琪（Kay）曾撰文心痛許多認識的街坊，於慘劇中痛失家園及親人，她亦因小學同學的母親罹難而傷心。今日（5日）是她入行21周年，她並沒回顧事業上的起伏，反之分享與摯友Lolo之間多年互相扶持的點滴，也說了這位摯友的故事。Kay上載一張與Lolo兒時合照，Lolo是她的小學同學，其母就是宏福苑罹難者之一。
縱使Lolo近日帶着悲痛心情勞碌奔波，處理許多事情，但仍不忘提醒Kay︰「時間唔等人，我哋要把握每一分每一秒，好好活着好好愛着。」Kay寫道︰「今日係我入行21周年嘅日子，由2026年1月1日叱咤開始，呢幾日不斷收到好多來自四方八面嘅祝福，其中一份愛，係嚟自我小學嘅死黨Phyllis LoLo❤️ 由剛過去嘅11月26日到依家，佢經歷咗一段艱難嘅日子，面對佢媽媽羅太離世，我哋陪住佢一齊走過一同經歷，知道一切都好唔容易。」
她牢牢記着，摯友的母親羅太，是位超額完成的堅強媽媽，是她眼中的英雄：「作為單親媽媽，獨力養大兩個仔女，兄妹二人都長大成為好優秀、好有愛嘅人，佢喺我心目中好了不起，面對生活壓力仍一力擔當，永遠正能量滿滿，而且說話好幽默風趣，係一位超額完成嘅好媽媽，亦係我哋後輩眼中拚命為家庭奮鬥嘅英雄。」
Kay又指「Lolo秉承咗羅太嘅堅強，係一位非常樂於分享正能量嘅事業女性，佢唔會對難關妥協，待人處事光明磊落不拖泥帶水，係我哋朋友之間嘅光，永遠一語中的道出我哋需要聽嘅說話，我常常為呢位老友感到自豪。」她想起羅太有一個威嚴名字「老英」：「當中有一個小巧合亦都好觸動我嘅心羅太本名叫『老英』，人如其名，佢係我心目中一位英雄，我小學時第一次聽到auntie個名，立即聯想到天空中有威嚴又自信嘅老鷹，自由自在任意飛翔好不威風，依家每當見到天空有鷹飛過，我就會想起兩個熟悉嘅名字，兩個不斷帶俾我力量嘅人，好似佢哋又飛過嚟探我、鼓勵我、陪伴我一樣。」
Kay以寫日記開解自己的習慣，也是受Lolo影響，她續說︰「而佢就係鼓勵我開始寫「未來日記」嘅人，所以每朝早寫日記嘅時候，我都會諗起佢，亦會諗起佢有一位咁了不起嘅媽媽，呢個寫日記嘅習慣，幫我以最好嘅心情開展每一日，俾咗好大嘅力量我好好生活。所以我想趁今日呢個特別嘅日子，分享我同呢位好友之間嘅點滴。」
痛失家園的Lolo，個多月來每日為各樣安排勞碌奔波，在極度悲傷心情，仍沉穩地處理各樣繁複的文件同程序，及母親身後事。「今朝佢同我講已經處理好所有事，仲提醒我哋要珍惜生命、珍惜時間，因為時間唔等人，我哋要把握每一分每一秒，好好活着好好愛着。」原來兩個月前，Kay曾答應羅太，待她大馬巡演後回來茶敍，可惜一場災難令這個約定成空。這份遺憾，她深切體會「時間真的不會等人」。
Lolo面對突如其來的重創、永別， Kay仍從她身上看到那份光：「Lolo嘅說話同佢面對難關嘅態度，令我更加相信每個人活着都有自己嘅意義，無論幾艱難、幾多挑戰，我哋都要堅持，做自己人生中最想做嘅事，成為自己最想成為嘅人，活出生命最美好嘅意義。」
她指：「我嘅摯友Lolo，讓我見證到佢對生命嘅熱愛，佢將對佢媽媽嘅愛同思念，好好安放喺心裏，同時亦記住媽媽嘅說話，努力回到生活軌道，喺佢最難過嘅呢段日子，佢帶住傷痛迎難而上，令我深刻咁感受到、體驗到，佢對媽媽嘅尊敬，同對生命最大嘅熱愛。」
Kay藉Lolo的遭遇同對生命應對，很想給予一份鼓勵與力量，讓正閱讀這篇分享的每一個。「好想同大家分享呢份真切嘅力量，因為我相信，人與人之間就係咁奇妙，我哋嘅故事雖然各有不同，但係情感卻係互通，如果有緣睇到呢段文字，希望你都可以感受到，每個人嘅生命，都有唔同嘅意義、唔同嘅節奏，唔同嘅溫度、闊度、深度同態度，所以我哋更加應該珍惜大家嘅唔同，多啲包容，多啲理解，多啲關心，願呢個分享，可以為需要力量嘅朋友，帶嚟一點鼓勵、一份溫柔同一個擁抱。
「喺入行21周年呢個日子，我衷心祝願我好朋友Lolo，佢哥哥同埋佢哋其他家人，祝願我嘅家人、朋友，我嘅團隊同埋愛我嘅所有人，將需要放下嘅，留喺2025年呢一個特別嘅位置好好安放，2026年係一個新嘅開始，我哋帶住勇氣帶住愛同埋所學習到嘅經驗，繼續努力做成就自己生命意義嘅事，我好愛你哋，多謝你哋一直咁愛我。」
本文作轉載及備份之用 來源 source: http://hk.on.cc
|
鍾意就快D Share啦！
|
|
|
