年輕時拍拖過份容讓 曾被勸搵有錢佬難以認同
被金成問到拍拖時是否過份遷就與容讓，她坦言年輕時會，亦不覺辛苦：「你鍾意嗰個人， OK啦，有啲嘢唔係咁重要就OK囉，唔係講屈我個人，要我性格去轉變，當然有啲嘢係講緊，我相信係啱嘅人自然就會夾到好多嘢，可能嗰啲人係唔啱，但而家睇返轉頭，我又覺得有啲經歷係好好喎，因為我而家好清晰自己要啲乜嘢，好清晰，就算當年有啲朋友問『你究竟想要乜啫？』我話搵一個夾同愛嘅人，大家相處舒服，佢話你咁樣咪錯囉，佢話你梗係要搵個有錢啦，真係係咁同我講，我望住佢，喺我角度係錯㗎囉，我覺得唔係咁。佢話你咁樣咪唔實際囉，你唔會搵到呢個人，我好深信呢個世界一定有。」
慶幸經濟獨立有得揀 國籍非重點最重要價值觀相近
她覺得「對的人」要相處過才會知道，她也頗欣賞外國情侶相處時的互相尊重、當大家好友的平等關係：「唔係話我搵錢多過你，我就有多啲say，唔係咁樣，中國人我會睇到身邊有啲朋友Situation係咁樣，我覺得我唔得，自己經濟獨立，呢個係好幸運嘅一樣嘢，我可以去揀，好基本。價值觀好緊要，要相近，當價值觀唔同朋友都做唔到，唔好話男女朋友。」縱然如此，宣萱也不覺得要跟外國人拍拖，她自言曾與華人、外國人交往，但各自都有「夾唔到」的地方，譬如外國人都不明白為何華人子女要買樓畀父母、供養父母之類，因此她認為與人種無關：「純粹嗰個人本身，要遇到一個啱嘅人我相信就會啱，價值觀自然會似，似你先會相吸。」除價值觀外，宣萱找男伴亦必需要風趣幽默和識得自嘲。
曾做第三者相信與性格強弱無關 初戀男友難忘舊愛慘變愛的替身
宣萱過往曾在訪問中談及自己曾當第三者，金成就問她有否分析過原因，會否跟性格太強或太弱有關，宣萱表示：「我覺得未必因為你弱，所以佢覺得可以瞞天過海，反而好講嗰個人自己。」她提到初戀男友當時跟前度分手後，就與宣萱拍拖，不過後來女方與新男友分手後，又回頭找宣萱當時的男友，二人因而分手：「可能佢真係好好愛嗰個女仔，只不過佢冇咗，咪同第二個囉，咪同咗我囉。咁咁啱嗰個女仔搵返佢，佢仲好愛佢，咁佢咪做咗呢樣嘢囉，嗰時梗係好傷心啦，但係而家睇返當時大家都後生，後生嘅男仔未必咁成熟去處理咁多問題。」
誤當第三者感晴天霹靂 受傷後不相信男人
至於第二任男友，就令宣萱慘成第三者，她透露：「第二個好明顯係原來我係第三者我自己都唔知，係我啲大學同學，佢哋識嗰個男仔，忍無可忍同我講，話其實佢有個女朋友，你唔好以為佢係第三者，其實我先係第三者，嗰時又係晴天霹靂，覺得咁係自己傻囉，係你自己唔知。佢花心係一樣嘢，但係佢呃到我，嗰時真係驚，第二次真係驚。」宣萱坦言自此不信男人，並謂：「會小心好多，但係又冇真係影響到我唔想拍拖，唔係嘅，只不過你再識到嘅時候，你會留意多少少，但係唔多唔少一定有啲影響，你一sense到佢做咗啲嘢同嗰個人好似，我會驚，會即刻縮。」至於現時，人大了、經歷多了，不論拍拖或工作，敏感度都比以前強，有時對方「趷起條尾」宣萱已知對方意圖，她更說：「其實有問號已經係一個問題，嗰個人冇問題，你唔會有問號，如果大家相處係開心。」
本文作轉載及備份之用 來源 source: http://www.hk01.com
|
鍾意就快D Share啦！
|
|
|
