約基利斯今季第8個入球。(Getty Images)
周四(15日)凌晨英聯盃4強首回合，阿仙奴作客3比2擊敗有新帥羅仙尼亞領軍嘅車路士，次回合返主場晉級形勢大好。「兵工廠」前鋒約基利斯今場1射1傳，打破展達2個半月嘅生波入球荒，暫時洗脫「水貨」污名，領隊阿迪達賽後亦盛讚呢位瑞典前鋒嘅重要性。
阿仙奴今場強陣出擊，場面上亦反客為主佔優，開波7分鐘即靠招牌角球開紀錄，羅拔山齊士出迎打空，被賓韋特頂鬆頂入。49分鐘阿仙奴右路突破，約基利斯接應傳中門前3碼掃入；一直捱打嘅車路士，57分鐘由阿歷真度加拿祖窄角度射入，追番1比2接近紀錄。
71分鐘，阿仙奴再有美妙組織，布卡約沙卡、米基爾馬連奴同約基利斯短傳入滲，約基利斯禁區內彈畀蘇比文迪扣過對手抽入；不過車路士未有放棄，尾段角球攻勢，加拿祖再次喺遠柱搵到機會射入，最終都要輸2比3，但次回合仍保有一線生機。
約基利斯今場1射1傳，獲選為今場最佳球員，呢位瑞典前鋒自上年11月入波兼受傷，最近2個半月各項賽事只係入過1球12碼，被評為英超「水貨」，今場大戰終吐烏氣。約基利斯表示：「呢個(入波)係我嘅工作，我需要更加經常咁做到，今場球隊贏波，但只係首回合，要繼續努力。」
約基利斯季前以6,300萬鎊轉會費加盟，今季踢25場有8入波同2助攻，阿迪達賽後亦力撐愛將：「入球係佢一直堅持嘅回報，佢今場一如以往，仲為球隊做咗好多嘢，表現非常好。我明白有啲人唔會欣賞佢入波以外嘅工作，但我哋就好肯定佢嘅貢獻，呢個入波係佢應得。」
足球博彩神器，每日重心提供盡在《彩報》：http://win.on.cc/football/
本文作轉載及備份之用 來源 source: http://hk.on.cc
|
鍾意就快D Share啦！
|
|
|