「長腿女神」連詩雅與老公婚後更恩愛，有女萬事足的她，除了精神上支持老公外，甚至金錢上亦願意全奉獻，坦言不介意「養埋老公」；笑言嫁對方只是貪靚仔，更自爆有套婚姻保鮮法，杜絕「小三」乘虛而入。
37歲的歌手連詩雅（Shiga）結婚近3年，婚後育有一女，夫妻感情更勝拍拖時，早前Shiga推出新歌《人生使用說明》及《限量版》時接受本報專訪，自認非世上最偉大母親，強調不會為家庭放棄事業，不過她不諱言：「我好易焦慮，如果只係湊女唔做嘢就會癲，我亦有好多嘢想試，以前好恨拍愛情小品，依家唔會接，唔關人妻身份事，只係經歷過人生嘅甜酸苦辣，已經冇可能做番最天真無邪嘅自己，現實係好殘酷嘅！」
雖非滿分媽媽，但Shiga一定是「老婆世一」，講到明可以「一婦當家」，支持老公為鑽研角色而停工兩年，她豪氣地說：「支持佢做任何事，養埋佢都OK，佢有錢時再養番我，我最唔鍾意喺感情上講錢，呢個世代冇邊個應份養邊個。（結婚唔係想佢養？）梗係唔係啦，嫁佢係因為佢靚仔，哈哈哈，佢養我係Bonus。」又指以前心目中的理想伴侶是成熟男，更覺得靚仔冇本心，但老公卻打破其設定，給予她安全感。
主動互報行蹤
說到另一半靚仔，Shiga被問到可擔心老公抵受不住誘惑而出軌，她表示不會想假設性問題，對自己亦有信心，她覺得：「我揀得呢個老公就知佢唔會傷害佢好珍惜嘅人。（佢真係咁乖？）至少畀我睇到係囉，唔好畀我知道唔係！當然，我好愛佢先同佢結婚，會好好維繫呢段關係同感情。」問到可有在老公身邊設「線眼」提防「小三」？她稱沒有刻意，只是和老公的同事一向保持聯絡，況且夫妻間有愛情保鮮法：「佢去到邊都會主動同我講，正如佢都會知我做緊乜。個女係好重要，但唔會因為生咗女而忽略對方感受，拍拖至今，我哋每朝或瞓覺前都會同對方傾偈。」
來自單親家庭的Shiga明白「世事無絕對」，所以早已安排後着，不諱言將來無論發生何事，都能確保自己及女兒活得好，因此她更要在事業上幹一番成就，而另一原因是希望成為女兒的Strong Mom：「我讀書時曾經被同學欺凌，但我好『鵪鶉』唔識同老師講。（係咩欺凌？）精神上，未至於郁手郁腳，所以我要變強，做個好榜樣畀個女睇。」
黃翠如驚喜賀壽星
連詩雅老友梁諾妍、黃翠如都為母則強，是圈中數一數二的好媽媽，事業、家庭都平衡得非常之好。近日，黃翠如為2月2日生日的梁諾妍提早慶祝，梁諾妍事前不知情，故當翠如與友人拿出蛋糕時，才恍然大悟，十分驚喜，她於社交平台分享照片，寫道：「食個飯仔都有得切蛋糕，Thank you for reminding me，成日都唔記得自己就嚟生日。」雖然今次生日飯未見連詩雅，但她與壽星女經常在網上互動，早前梁諾妍分享與小朋友到士多啤梨農場摘生果玩耍，連詩雅即留言叫她下次預埋她兩母女，齊齊遊玩一番。
本文作轉載及備份之用 來源 source: http://hk.on.cc
|
鍾意就快D Share啦！
|
|
|