周日（4日）晚英超頭場上演玫瑰打吡，曼聯只靠馬菲奧斯根夏做救世主妙射得手，作客逼和下游分子列斯聯1比1，近5場聯賽4度失分，愈踢愈沉。
曼聯上場畀包尾嘅狼隊逼和堅羞家，今場用番343陣式，隊長般奴費南迪斯繼續因傷倦勤，惟有以柏德列杜古同馬菲奧斯根夏，支援箭頭班捷文施斯高，諗住先發制人，一開波根夏即勁射破網，可惜有球員越位在先，食咗鋪詐胡。之後雙方有來有往，列斯聯先有卡維特利雲近門一頂中柱，其後曼聯亦有約羅頭槌被救出，半場互交白卷。
易邊後戰情一度膠着，直到62分鐘列斯聯一次大腳長傳，班頓艾朗臣以速度力壓艾登希雲單刀得手，終於打破僵局。不過佢哋只係開心咗2分鐘，啱啱後備落場的約舒亞舒克斯即有貨交，妙傳根夏窄位快射慢溜尾袋，極速扳平，呢位巴西球員之後再有一腳妙射中柱彈出，最終各一言和，曼聯近5場聯賽僅1勝，連場失分令人失望，相反列斯聯連續7場未輸過，護級重現希望。
本文作轉載及備份之用 來源 source: http://hk.on.cc
|
鍾意就快D Share啦！
|
|
|