施斯高近7場比賽攻入6球。(Getty Images)
曼聯又贏1場！周二(24日)凌晨英超獨腳戲，曼聯憑「後備殺手」班捷文施斯高一劍封喉，作客1比0擊敗愛華頓。曼聯贏波後放甩車路士同利物浦，更逼近第3名嘅阿士東維拉到只落後3分，下輪主場對水晶宮，有望延續卡域克領軍嘅神奇之旅。
曼聯上輪打和韋斯咸終止4連勝，抖咗近2星期後今仗強陣出擊，開波4分鐘就幾乎領先，可惜阿密特迪亞路射門，被達高斯基白界前解圍；達洛治、麥比奧莫同般奴費南迪斯之後都有射門柱邊出界，半場兩隊打和0比0。
換邊後愛華頓搶返優勢，卡域克喺58分鐘換入施斯高，「神調動」果然奏效，71分鐘曼聯快速反擊，麥比奧莫助攻後上嘅施斯高射入。愛華頓尾段極力反撲，但曼聯堅守城池，保住1比0勝果，卡域克上任後6場聯賽取得5勝1和。
施斯高近7場比賽攻入6球，佢喺卡域克執教下雖然失去正選，但近4場聯賽3次後備上陣入波，包括補時絕殺富咸、補時逼和韋斯咸，同埋今場一箭定江山，含金量極高。施斯高表示：「無論踢5分鐘定90分鐘，最重要係盡力貢獻自己，盡力幫助球隊。」
卡域克賽後亦大讚呢位斯洛文尼亞射手：「精彩嘅入波，佢非常果斷，好有自信咁射門，佢同麥比奧莫、馬菲奧斯根夏嘅配合都好好，好開心見到佢落場後再次改變比賽。施斯高狀態好好，而且好有耐性，佢係曼聯長遠嘅重要球員。」
最強博彩盤路過關神器《串績王》：http://win.on.cc/football/
本文作轉載及備份之用 來源 source: http://hk.on.cc
|
鍾意就快D Share啦！
|
|
|