演繹「難頂」女上司 阮嘉敏現實係好老闆：員工好難請
阮嘉敏在《非常檢控觀》的單元個案中，飾演一名性格巴辣、令下屬聞風喪膽的女上司。受訪時阮嘉敏笑言角色相當「難頂」：「個角色係比較巴辣，係嗰種講嘢語氣好差，會有啲『八婆仔』感覺嘅上司。因為想掩飾一啲嘢，就會好惡咁鬧下屬，『點啊！』、『咦！』嗰啲語氣出晒嚟。」
被問到現實中是否也是如此強勢，經營自家品牌的阮嘉敏即時否認，更道出作為僱主的心聲：「梗係唔係現實中我對員工好客氣，因為大家都知而家請人好難，所以我對Part-time或者Freelance都好有禮貌。今次個角色完全係相反，係一個好野蠻嘅經理，覺得自己做得都幾出色，大家睇就知我有幾『八婆』！」
挑戰內地短劇 自恃「TVB出身」輕鬆應對點知伏咗
除了宣傳新劇，阮嘉敏亦分享了早前12月中到西安拍攝內地「短劇」的辛酸史。阮嘉敏透露該劇片名暫定為《瘦一斤換一金》，講述一個220斤的肥妹減肥的故事。雖然拍攝期僅得一星期，但強度之高令她始料不及。
阮嘉敏憶述：「去之前個監製同我講話會好辛苦，問我得唔得。我心諗我喺TVB出身，出名捱得，完全無問題啦，呢啲基本嘢嚟。點知去到拍第一日，我就覺得原來TVB好舒服！」
每日僅睡4小時 殘到監製叫收工
阮嘉敏透露在西安拍攝的6天簡直是「打仗」，短劇節奏極快，全劇72集濃縮在一周內拍完：「每日開工最短16個鐘，最長試過踩20個鐘！基本上無時間返酒店，喺片場瞓醒就再拍，每日淨係瞓得4個鐘。」
阮嘉敏笑言拍到最後幾日，連監製都驚她會隨時暈低：「我有日個樣殘到不得了，監製行埋嚟問我餓唔餓，我話餓，佢即刻話：『好啦收工啦，你返去休息啦，聽日再拍。』佢應該覺得我就嚟唔得，驚我第二日連樣都無埋。」儘管過程辛苦，阮嘉敏表示這是一次很好的磨練，也很高興能將香港演員的經驗帶到內地交流。
本文作轉載及備份之用 來源 source: http://www.hk01.com
|
鍾意就快D Share啦！
|
|
|