視后佘詩曼（阿佘）與陳煒主演的無綫新劇《正義女神》最近在內地網上平台率先播出，反應熱烈，今晚（20日）眾演員現身惠州的商場為劇集宣傳，眾人商場內的玻璃天橋上亮相及向粉絲們打招呼，雖然陳煒以白色裙上陣，但由於演員們事先知道現場環境，故已做足安全措施防走光。
講到新劇大受觀眾歡迎，網民稱讚阿佘演技精湛，有望5度封視后，對此阿佘謙稱：「唔係我一個功勞，台前幕後監製劇本所有人都有功勞。」劇中其中一幕是阿佘跟陳煒對峙，兩人各持己見，阿佘坦言第一次跟女對手演這種戲份，陳煒直言非常刺激，並自爆：「劇本唔係寫到咁，係臨場發揮，大家會疊聲，更加真實。」談到《新聞女王2》成績好，帶挈廣告及周邊等不少商機，阿佘直言好開心：「感謝網民同觀眾支持，希望今次都做到更好，我能力範圍做到已經做晒。」
另外，陳煒在劇中跟古天祥有親熱床戲，陳煒透露是由她親自挑選床戰對手：「（總監製）鍾澍佳問我想搵邊個做對手，我揀咗古天祥，因為我同佢識咗好多年，以前喺亞視有個情人節宣傳，就係由我同佢一齊拍，仲係有床戲，大家一次生兩次熟，所以就搵咗佢。（床戲有冇問老公批准？）有問過老公，入面件衫係我私伙自己買，因為驚走光，所以自己買穩陣啲。（老公睇完有乜意見？）佢話點解段戲咁短。」談到陳煒之前被網民捕獲，獲讚素顏都靚到發光，她稱當日參加完春茗後，正徬徨地尋找老公的座駕，完全不知道被影相，她開心說：「多謝網民嘅拍攝角度好好，加埋個慢鏡頭效果，好多謝佢。」
提起劇中飾演陳煒兒子的劉倬昕因反串而爆紅，阿佘及陳煒均大讚對方演得好及很用心，阿佘謂：「因為反串好有難度，佢話好緊張自己嘅表現，我話咁就啱，你要記住呢個感覺。」又講笑指可能對方天生有壞的底子，所以演得好。談到《正》劇是契老竇許紹雄的遺作，她表示：「拍攝時好開心，睇嘅時候勾起好多回憶，好掛住佢，大家會喺劇中會見到佢嘅另一面。」而今日阿佘在社交網上載跟MIRROR成員Edan、Jeremy、Jer及ERROR成員肥仔等人打麻雀的相片，她笑言：「畀肥仔激死，辛辛苦苦畀佢一鋪清袋。（點個組合咁得意？）已經係幾年嘅事，每逢新年就會聚頭，只係大家唔知。（最後邊個贏？）當然肥仔，我咁多年來都有贏過幾十蚊，但因為今日要工作，所以尋晚冇得上訴。」
本文作轉載及備份之用 來源 source: http://hk.on.cc
|
鍾意就快D Share啦！
|
|
|
