遺傳性抑鬱症病發 曾幾日唔沖涼唔出街
談到久未露面，陳啟泰直言已有一段時間沒出現在螢光幕，亦沒有出現在香港娛樂圈，因為他在2022年期間患上一場大病，他表示：「當年發病最主要原因係家族遺傳，我媽咪以前都有抑鬱症。」在病發最嚴重的時期，他的生活完全癱瘓，甚至出現自我放棄的情況：「我試過兩、三日唔沖涼唔出街，當時太太100%時間陪我，佢抽離咗佢教會嘅工作，每日24小時、一星期7日咁陪咗我半年有多，日日對住個傻佬，搞到佢嘅精神都唔係咁好。」
陳啟泰憶述有段時間即使吃了家庭醫生開的安眠藥，還是一個小時都睡不著，但又不敢看醫生，因正值新冠疫情高峰，每日數萬宗確診，看著窗外的救護車不斷接走病人，令他心理壓力極大，如果被隔離一定會發癲，最後全靠在太太鼓勵下，鼓起勇氣尋求精神科醫生治療。他更坦承，由於住在高層單位，情緒低落時曾閃過輕生念頭：「因為我住得高，望落去都有個咁嘅念頭，好彩我唔夠膽。」
服藥致體重飆升至216磅 靠運動抗病康復七八成
由於要服用藥物治療，副作用令陳啟泰體重暴增，最高峰時曾達216磅。他表示：「依家180幾磅，比我十幾年前都重咗少少，但我反而覺得依家最緊要收腫，希望大家每次見到我都無咁腫。」他表示目前已停藥一年，全靠積極運動和家人支持來對抗抑鬱：「依家好返七、八成，每日都好似有份工咁，積極做運動去對抗呢個病。」
揭《百萬富翁》明星版造馬真相
除了分享抗病心路歷程，陳啟泰亦宣傳新節目《健康百萬大道》。提到近日受訪時大爆當年《百萬富翁》明星版「造馬」，陳啟泰大方回應：「因為明星版嗰幾集係做慈善，咁梗係多多益善，唔通捐8000蚊，梗係100萬啦。同埋有星爺周星馳、黃霑等咁勁嘅嘉賓上嚟節目，你唔同佢玩到100萬，你自己蝕底。」
陳啟泰稱當年周星馳上節目前曾提出條件，就是要坐主持位反客為主發問。「佢話『我要做主持，我要坐你個位，我問問題，你答問題』，呢個其實係一個好好嘅橋，觀眾睇得好新鮮。我記得星爺第一條問，邊個係佢真名，其實我知道周星馳係佢真名，但有個答案佢讀錯咗，咁呢個就梗係佢真名啦，所以星爺真係一個好勁嘅搞笑能手。」陳啟泰更爆料不只星爺，很多明星嘉賓現場都有FM在後面「提水」給提示，目的都是為了讓氣氛更熱鬧，並爭取更多善款。
邀陳芷菁上新節目平反
問他為何不給陳芷菁提示，害對方被人笑足多年？陳啟泰笑言：「其實係有架，因佢當時去到六萬蚊，就算答錯都唔會無曬錢，但芷菁好衰唔衰，衝口而出一句『我讀 Drama 㗎』，令到成件事好慘，佢可以話係壯烈犧牲咗。」
陳啟泰稱稍後亦會有另一節目《健康百萬大道》，圍繞一些香港人常見健康問題，例如濕疹、精神疾病等等，形式有點類似百萬富翁。陳啟泰笑言：「我今次第一個邀請嘉賓就係陳芷菁，我特登請佢上嚟，俾個黃金時間佢去平反，因為佢以前做過關於濕疹嘅大使，所以濕疹問題，佢一定瞭如指掌！亦都俾機會我向佢道歉。」陳啟泰更幽默說：「如果佢今次都答唔到，我會代佢答。我會話：『呢條問題我識，因為我讀經濟㗎！』」
本文作轉載及備份之用 來源 source: http://www.hk01.com
|
鍾意就快D Share啦！
|
|
|
