現年19歲的「聲夢小花」鍾柔美（Yumi）早前被踢爆「偽A0」並背負大話精之名，人氣急滑及面臨事業低潮，面對網民批評，Yumi反認為初入行時外界對她的唱功、衣着的批評衝擊性更大。雖然一時間面對排山倒海的負評，但她坦言從未萌生退出娛樂圈之意，年紀輕輕果然內心強大。
無綫旗下歌手鍾柔美入行時自認「A0」（拍拖次數為0），然而早前連環洩「蜜」，先在社交網疑錯手貼出跟緋聞男友劉展霆的錫面照，其後再爆出多張中學時跟男友的接吻照，令其「A0」人設崩壞，更遭狠批「大話精」，陷誠信危機，形象盡毀，事後她雖認錯兼爆喊道歉，唯不少網民仍不買帳。
Yumi日前接受東網專訪時，透露已沉澱了一段時間，現時心情已平復，說到發現相片在網上流傳時的心情，她坦言：「我呆咗，因為冇諗過，對啲相有啲印象，但去到嗰刻冇得控制，惟有諗點同大家解釋。（點捱過呢段時間？）都係專心返學，諗咗好多嘢。（諗咩？）同朋友之間嘅信任。（有冇諗過網民反應咁大？）我有預測大家嘅反應，但冇諗過會將呢件事放到咁大。」她表示沒有刻意留意網民的留言，因難以控制別人的想法及一舉一動，問到哪些留言令她最難受，她反而提起參加《聲夢傳奇》比賽時，獻唱第一首歌後網民對她的批評：「當時好多人攻擊我嘅唱功同衣着，呢件事令我更加難忘，冇諗過咁多人講我，當時感覺會難受啲，因為係我第一次畀外界嘅人講。」對於網民對她的道歉不收貨，認為其態度是「唔知衰」，她無奈地說：「網民講嘅嘢係佢哋嘅自由，但只有我自己最清楚自己，我今次真係知錯，同大家道歉，我會做好自己，努力讀書同工作。（點去令大家改觀？）我會用作品講畀大家聽，希望大家可以見到我嘅努力。」
今次風波令Yumi人氣大跌，問她可曾想過作最壞的打算，退出娛樂圈，她表現甚為樂觀：「冇呢個想法，公司好支持我，有人問公司係咪雪我，其實冇，公司畀好多工作機會我，我好享受依家嘅工作。」說到現階段隨時被後起之秀取代，她認為在娛樂圈難以避免：「我都有諗過，我出去上堂學跳舞，見到好多細過我又優秀過我嘅人，新人不斷加入，惟有增值自己，學多啲嘢，發掘自己嘅招牌。」
家人被「起底」最不開心
她感激粉絲不離不棄，直言風波後首次出席公開活動，曾想過冇人到場撐自己，想不到仍有大批粉絲現身，令她大為感動。她亦感激家人的無條件支持，事件令她最不開心的是其母遭「起底」，爆出曾於夜總會工作：「佢哋唔係圈中人，唔希望大家講佢哋，希望可以尊重佢哋，我寧願大家講我。」她指今次事件讓她上了人生很大一課，亦令她變得更堅強：「見到朋友同家人都好支持我，佢哋令我更加要向前行，唔好望番轉頭。（驚唔驚再被爆黑材料？）我會喺識朋友同影相方面小心啲。」
另外，Yumi參演的無綫劇集《臥底嬌娃》正在熱播，她稱拍攝期間憶起參加《聲夢傳奇》的日子，坦言劇中最難的部分反而是自己最擅長的跳舞：「因為我要坐輪椅跳舞，初時以為好簡單，但原來比正常跳舞更難，要用好多手力，其中一個pose我要將輪椅嘅重心放喺陳瀅身上，初時好驚自己太重，發現佢竟然可以承受到我嘅重量，覺得佢好man。」Yumi於劇中跟陳瀅等人組成女團，說到她現時跟組合「After Class」成員姚焯菲及詹天文各散東西，她坦言「預咗」:「各有各發展係好自然嘅事，最重要係大家開心，做到想做嘅嘢。（之後有冇機會合體？）公司冇特別提及，都係專注個人方向。（可惜？）唔會，我哋工作嘅時候都會見到對方。（私下約出嚟？）冇，大家都好忙。」
本文作轉載及備份之用 來源 source: http://hk.on.cc
|
鍾意就快D Share啦！
|
|
|