般奴費南迪斯今季第18次助攻。(Getty Images)
周日(19日)凌晨英超「歐聯資格爭奪戰」，曼聯作客車路士全場處於劣勢下，憑馬菲奧斯根夏「一擊即中」，幸運1比0贏波穩坐第3位。曼聯依家領先第6位嘅車路士10分，最後5輪只需要拎多6分，就肯定拎到歐聯資格，般奴費南迪斯更進一步逼近英超助攻神紀錄。
曼聯今場鬧中堅荒，4大中堅唔係停賽就受傷，最後要用馬沙拉奧客串，拍住小將艾登希雲鎮守中路，不過面對車路士圍攻都頂得住，更喺43分鐘靠般奴費南迪斯右路傳中，由馬菲奧斯根夏第1時間射入，呢球亦係曼聯全場唯一一次中目標埋門。
換邊後車路士繼續狂攻，但門楣兩次救番曼聯，高爾彭馬、摩西斯卡些度射門又冇準，全場預期入球(xG)有1.55球都入唔到波，最終曼聯保住1比0勝果。般奴費南迪斯今場交出今季英超第18次助攻，進一步逼近由亨利、奇雲迪布尼保持嘅單季20次助攻紀錄。
曼聯捱打下贏波，領隊卡域克表示：「足球係睇結果，我哋拎到想要嘅成績，依家同第6位距離拉開咗，雖然仲未足夠，但今場仍然值得享受到回味。般奴費南迪斯影響力好大，佢做隊長當然有原因，將會係曼聯未來幾年重要嘅成員。」
最強博彩盤路過關神器《串績王》：http://win.on.cc/football/
本文作轉載及備份之用 來源 source: http://hk.on.cc
|
鍾意就快D Share啦！
|
|
|