作品如瀑布傾瀉而下錯落有致
大型鉤織作品《荒島之幻象》於南豐紗廠地下紗廠坊懸掛展示，錯落有致的鉤織線條所編成的作品如瀑布傾瀉而下，震撼感人。以藍綠交融作為主要色調，模仿大自然一呼一吸。觀賞者無論以沿線條探索或從整體感受，都能夠找到陳蕾透過作品傳遞靜謐而流動的藝術創作心境。
首個大型鉤織作品登場
首次以鉤織藝術家身份出席活動的陳蕾，親身見到作品於現場展示時非常感動：「好多謝南豐紗廠搵我參與今次『約好織物祭』，畀個咁好嘅機會同推動力我去鉤咁大型嘅作品。呢個作品接近三米高，用咗好多時間去鉤，真係打破晒自己嘅紀錄，用咗好多心血，希望大家都鍾意。」
陳蕾：建議一邊聽歌一邊欣賞
鉤織作品《荒島之幻象》與陳蕾包攬曲詞唱的音樂作品同源。陳蕾：「我喺鉤織嘅時候會好放鬆又好集中，全身心投入咗去鉤織世界咁，好似一個心靈回復平靜嘅冥想過程。今次收到南豐嘅邀請之後，我立即諗到《荒島之幻象》呢首歌。首歌喺五年前推出嗰陣，有樂迷話編曲好迷幻但歌詞好有畫面，我想試吓將個感覺鉤出嚟，再睇吓大家嘅反應。大家嚟到可以一邊聽住《荒島之幻象》，一邊投入感受吓個作品，再話我知你哋嘅感受。」
即將飛赴英倫展開巡唱首站 更多巡演消息不日發佈
陳蕾除了於鉤織藝術有所突破，音樂創作方面亦馬不停蹄。陳蕾：「今年真係好澎湃，年頭推出咗第四張個人大碟《凝》，三月做咗一連四場《完整的我》音樂會。過幾日我就會起程飛去英國，6月5日喺倫敦有《完整的我》巡迴首站嘅演出，真係未出發先興奮，因為呢次係我第一次海外巡迴！希望大家都睇得開心。記得留意之後其他巡唱地點嘅資訊，多謝支持。」
《荒島之幻象》5.30至7.5南豐紗廠免費展出
陳蕾首個大型鉤織作品《荒島之幻象》將於5月30日至7月5日免費於南豐紗廠六廠地下紗廠坊舉行之第三屆「約好織物祭」中展出。由南豐集團社區項目「世界之約」策劃的年度企劃「約好織物祭」以編織為主題，帶大家走進織人的世界，一起發掘編織的無限可能。現場除了展示陳蕾的大型鉤織作品《荒島之幻象》，亦同步展出另一重點藝術作品：由劇場編劇及導演甄拔濤與美術指導馬家銘聯手，基於作家陳慧短篇小說《木棉情書》創作而成的沉浸式裝置聲音體驗《想聽 - 木棉情書》。
本文作轉載及備份之用 來源 source: http://www.hk01.com
|
鍾意就快D Share啦！
|
|
|
