藝人施明離世，令李泳漢、李泳豪兄弟不和浮面，李家鼎親揭家事，此事亦意外地令李泳豪前女友楊思琦獲得平反，不少網民更設立「楊思琦道歉區」向她致歉，戲劇性十足！
楊思琦早前接受HOY《九運會客室》訪問，談到當年公開與李泳豪的戀情，思琦直認「衰老實」：「開頭做Freshman、新人，咁我真係拍拖，啲記者問你『楊思琦，你係咪拍緊拖？』咁我咪話係囉……實則我拍緊劇個劇組100對couples都拍緊拖，但佢哋冇人出嚟認，我嗰時真係好蠢，我做乜認呢？我應該唔好認呀，我依家大個，嗰陣如果畀我選擇，我唔鬼認，咁依家你哋咪唔知道我拍咗拖囉！」她直言公司事後都有叫她「收埋」，但她心想：「已經講咗，點收埋？！」
對於被鬧足十幾年「貪慕虛榮」、「拜金女」，思琦則以「百辭莫辯」回應：「我唔係咁嘅人，如果真係要搵個有錢嘅，我出嚟都會有人介紹，我連街都唔出，有人話『嗰個又好好，好富有！』『唓？關我咩事呀？』」她承認與李泳豪拍拖期間都曾有人追求，但自己沒有理會。對於近日獲網民留言為她平反，思琦直言有點始料不及：「分開咗有十幾年，嗰件事到依家……但係我真係冇諗過，譬如我直播，網民走入嚟話『我好支持你，加油！』......我不嬲都鬧衰晒......成日都話我衰，都冇人讚我好嘅，所以好感動！同埋我問心無愧！」
楊思琦與李泳豪分手不久便突然公開有BB，爸爸是內地前跳水運動員吳帥，主持問她「點解咁衝動？」她回答：「唔係衝動嘅，當時已經（同李泳豪）唔係一齊，咁啱啱展開咗，而呢個（指吳帥）係我以前認識嘅，而唔係話識咗十日就走去結婚嗰啲。」追問關係維持了多久時，思琦表示：「我諗……你真係考我，我點答你呀？維持咗幾耐……以前已經係認識，未同豪仔拍拖，已經係認識，唔係話你分手，之後先突然間認識咗新嘅一個。」她續說：「但係冇諗過原來係唔可以喺埋一齊，本應想走到去結婚嘅階段，但係唔能夠，你估玩咩？無啦啦生個女，梗係想有好結果！大家都有共識，但係發現有啲嘢真係唔OK，未必接受得到，成世㗎喎，咁你覺得唔OK，就算我有個女，咁我唔好意思，我真係唔可以一齊，但係我呢一個（小朋友）我都會keep住囉，因為係上天俾我嘅禮物嚟㗎嘛。」
楊思琦的現任老公身份依然成謎，問到思琦何解現時的老公收得咁埋，思琦笑言：「係，收得好埋，我唔敢講，我唔敢再講，唔好再問我！你知啦，踩蕉皮踩得多。」但她表示老公很疼錫她與前任所生的女兒Krystal，一家人生活得好好。
本文作轉載及備份之用 來源 source: http://hk.on.cc
|
鍾意就快D Share啦！
|
|
|