謝君豪和葛民輝（阿葛）6月攜手合作演舞台劇，強強聯手相當有噱頭，二人首次合作，未開始排戲已火花四濺，謝君豪真正接觸阿葛後，才知道對方是「大聲公」，聲音響亮，更多次勸喻對方收細聲浪無效，阿葛繼續嗌破喉嚨，盡顯其頑皮本性。
藝人謝君豪、葛民輝、韋羅莎、江𤒹生（AK）於下月5日起演出一連20場的舞台劇《Magic Hour魔幻時刻》，故事改編自喜劇大師三谷幸喜同名作品，謝君豪的角色除了是一名殺手，亦是一名三流演員，而阿葛則飾演一名江湖大佬。謝君豪表示以前經常聽阿葛電台節目，大讚搞笑，今次首次合作，直言「估佢唔到」，他謂：「我唔知阿葛講嘢原來咁大聲！今日我知道喇！下次我知道點做，如果企佢隔籬時我會側身少少，避開少少，冇咁應聲。（即係阿葛好嘈？）唔係，大聲囉！佢現實生活都好似做緊舞台劇咁。」
謝君豪出名演技好，問到要扮三流演員可有難度時時，他說：「有時都會做得唔好，睇Playback就會覺得咁做會好啲。（邊套做得唔好？）好多套都係，睇自己係好奄尖。」他坦言做藝人千萬不要以為自己係最標青，如果以為自己最無敵，就真的最痛苦，他分享個人經驗：「你放開自己，當一種經歷，去學習去玩，會開心啲，如果下下覺得自己好勁，當你知道自己有時唔勁時，你就好痛苦，要面對自己有不足之處。（咁先長做長有？）起碼開心啲，唔會大壓力。」
阿葛自認是舞台劇初哥，覺得舞台劇最難之處是有很多專業術語，例如「一個beat」代表停一停、「台左」、「台右」阿葛至今仍然搞不清。阿葛行內資歷深厚，就算做錯應該都沒人敢教訓他，他笑說：「邊個敢話我？我自己都唔敢話自己，因為話唔聽。」謝君豪也笑說：「所以我唔會話你。」對於「聲大大」，他笑言自己有「內置咪」，即場又以阿媽叫仔回家食飯腔展示其雄厚聲線。問AK可被嚇怕？他笑言：「冇得話驚唔驚，希望排練幾個月大家好好一齊玩。」阿葛講笑：「希望你捱到幾個月」AK識做地說：「唔係捱，係享受。」謝君豪趁機再笑罵阿葛：「你唔想人哋捱就細聲啲講嘢，人哋話唔係捱都係呃你啫，喺耳邊轟過嚟，根本聽唔到你講乜。」AK表示從前輩身上學習「轉數快」，笑言能應付20場演出，因為每場都有人工。
謝君豪曾先後與MIRROR成員Edan和AK合作，問還想跟那位團員合作時，AK立即推薦Lokman，謝君豪覺得Lokman無論個性、樣貌和感覺都很特別，不能一眼看穿；阿葛亦說：「好多同Lokman拍過嘅導演和工作人員都話見到佢會驚。」
本文作轉載及備份之用 來源 source: http://hk.on.cc
|
鍾意就快D Share啦！
|
|
|
