無綫昨日於灣仔會展舉行《2026 TVB年中節目巡禮》，雲集逾百小生花旦，包括陳豪、馬國明、陳展鵬、羅子溢、高海寧、張曦雯（Kelly）、陳自瑤、陳煒、龔嘉欣等，場面墟冚。現場晒冷下半年拍攝或籌備中的8套重頭劇，包括《玫瑰戰爭》、《模仿人生》、《飛常日誌II》、《璀璨之城》、《模範律師團》、《驅魔速遞》、《警是個大佬》及《枱底人生》。女藝人當中，Kelly一人獨佔3劇最威水，蟬聯「劇后」寶座；男藝人方面，同樣3劇在手的羅子溢成「劇王」，至於馬國明、陳煒、高海寧、陳自瑤、楊茜堯、傅嘉莉同有兩劇平分秋色。而現場播放各劇精彩片段，包括吳卓羲、高海寧及張智霖、陳曉華於《璀》劇中激咀戲、楊茜堯於《模範律師團》的新造型等。
「劇后」Kelly透露拍完《璀》劇後休息了數月，現在回復開工節奏，笑言久未工作，出席巡禮感到壓力，又指在即將開拍的《模範律師團》中首度跟好戲之人羅嘉良及楊茜堯合作，大為緊張。現時單身的她笑言為了準備開工而暫停拍拖，又爆早前生日，朋友們緊張為她介紹對象，令她啼笑皆非。
至於羅子溢受訪時謙虛否認做「劇王」：「我宗旨有工就開，攰嗰陣或者少時間陪小朋友都唔會有怨言，因為好珍惜每個演出機會，感覺公司製作劇集數量都好似多番。」他笑指太太楊茜堯即將開劇，自己終於有機會湊仔：「我恨咗好耐，哈哈！老婆開工都恨咗好耐，我就父兼母職仲要做埋補習老師。」他指家人有個「員工」群組，除了夫婦二人，還有外母、媽咪和女傭，由「老細」（楊茜堯）分派工作。而羅子溢與陳展鵬擔任男主角的《枱底人生》去年年底舉行開鏡拜神儀式，但昨日新聞稿上此劇演員名單「空缺」，據知是因演員檔期問題要延遲開拍，還會有男、女主角加盟，故暫時尚未能公布。
高海寧心郁做女團
同場高海寧以大露背裝及露波邊性感上陣，馬國明跟她受訪時全程不敢斜視。兩人合作的《飛常日誌II》將於下月推出，暫未有劇開的馬國明最近轉向歌手發展，夥拍蕭正楠及曹永廉於內地開騷，他自嘲唱歌只是掹車邊，高海寧則大讚他唱歌好聽，還唱到有震音，馬國明笑指只是驚到震。高海寧自言想組女團，更提議找馬國明太太湯洛雯拍檔，但馬國明唱反調指太太不懂搞氣氛。
曾坐鎮多套「強人」系列劇集的陳豪將與龔嘉欣主持綜藝節目《美食強人》，而他主演的《玫瑰戰爭》故事圍繞娛樂圈，在宣傳片段中出現姚子羚被人強暴的畫面，陳豪開玩笑說：「娛樂圈係咁啩！又好似唔係，哈哈！」另外，近年主力帶貨直播的陳自瑤稱有劇就拍，否認直播帶挈收入大增，自稱只是「小薯仔」。提到老公王浩信近日錄製新歌情緒激動落淚，她表示未有留意。此外，陳煒大讚《模範律師團》劇本正，透露角色冇忠奸之分，有點踩界。
勁敵雲集拗手瓜 林夏薇謙稱後輩
視后林夏薇（薇薇）早前回家鄉廈門舉行音樂會、獲邀為足球賽事擔任開場嘉賓，更榮升旅遊大使推廣家鄉文化，問到會否為此拍攝旅遊節目？她直言若有機會一定會出一分力。
薇薇表示今次主要宣傳新劇《玫瑰戰爭》，透露角色很有發揮，提到有指劇集延遲播出，是否利於年尾頒獎禮爭獎？她說：「以前大家係會咁樣覺得，但今年高手雲集，有佘詩曼、袁詠儀同蔡少芬，全部都影后、視后。（你都係！）我係後輩，哈哈！所以無論擺喺邊個月播都係咁激烈。」
「離家」未有定期 周嘉洛見步行步
藝人周嘉洛於節目巡禮上公布《愛．回家之開心速遞》即將結束，會開拍新的處境劇，問他是否已落實參與？他表示未收到通知：「《愛．回家》仲出緊劇本，未知幾時最後一集，有唔捨得，咁多年都喺個舒適圈，屋企安樂窩咁，但有始有終，會珍惜最後一集。」他笑言為公司效力，正劇與處境劇也想參與，現抱着見步行步的冒險精神享受工作。
談到好友馬貫東近日捲入李家鼎爭產風波，嘉洛表示不太了解事件，不會過問對方私事，又大讚馬貫東做事認真、溫柔，若有合適異性會作介紹。問到為何不介紹給自己？他說：「我想好似佢咁有好事業先，都擔心會辜負咗個女仔嘛！」
俞可程無緣出道嘆失望
藝人俞可程和何沛珈昨日現身節目巡禮，谷胸上陣的俞可程談到於《魔音女團》12強止步時，直言失望唔開心，自認有好大進步空間，並大讚參賽者厲害，打入12強已經當贏。問到會否再組一隊女團？她指坊間好多傳聞，不過要看節目組安排：「聽講有《魔音女團2》，如果有多一個團會好開心，因為16個女仔都好努力。」至於有機會出演《女神配對計劃2》，她笑言可奉旨揀男仔。
同樣參加《女神2》的何沛珈直言想跟「求愛勇士」互追，但現實中未試過主動出擊，又透露她們早前偷看參加者面試，各自有心水。
張振朗匿埋做運動：冇雪過！
視帝張振朗昨日自「雪藏」風波後首次現身無綫活動，宣傳劇集《模仿人生》，問到是否已「解凍」？他笑謂：「我從來都冇雪過嘅，咁啱呢幾套劇我冇份拍，咪同周嘉洛佢哋去玩HYROX，做多啲運動。」他坦言看報道才知道事件，感覺無辜，又澄清從未被公司要求交出社交帳號代為管理，更沒有所謂新合約。提到女友楊偲泳替他發聲，振朗表示二人互相關心，又指已入場觀賞對方演出的電影《夜王》加長版，可以接受其大膽尺度。
本文作轉載及備份之用 來源 source: http://hk.on.cc
|
鍾意就快D Share啦！
|
|
|
