藝人施明離世後，揭出一對孖生兒子李泳漢與李泳豪不和，並爆發二人爭產風波。昨日李家鼎公開大仔向他苛索金錢的電話錄音，對於父親的指控，李泳漢直指是弟弟背後指使，他又公開多段聲帶錄音，聲帶中李家鼎親口承認被李泳豪夫婦軟禁，更慘遭語言侮辱與經濟封鎖。
藝人李家鼎前妻施明離世至今，李家不停爆出家族風波，先是李泳豪太太Agnes因對施明不尊重，而被大仔李泳漢禁入靈堂，身為父親的李家鼎就不斷抨擊李泳漢，直言被當作「人肉提款機」。李泳漢則表示父親所有指控皆受弟弟指使，為了爭身家而抹黑他。李泳漢接受本報獨家訪問時，直指李泳豪夫婦一直處心積慮爭身家，他說：「爸爸戶口畀李泳豪掌控咗，佢哋就拎咗340萬，我一毫子都冇攞過。」李泳漢由頭到尾都相信父親被操控，並指：「爸爸完全冇自己回應，全部都係李泳豪代表佢發聲，包括話接管佢遺產，又話要打官司，因為李泳豪兩公婆出發點係爸爸同媽媽身家，佢哋根本就係鋪定路行呢一步，要整死我，等冇人同佢哋爭家產。」
李泳漢又公開多段電話錄音聲帶作證，揭爆父親被李泳豪軟禁，又被李泳豪兩公婆言語恐嚇、威脅與侮辱等。從聲帶中清楚聽到李家鼎講及Agnes如何威脅他就範：「佢（Agnes）一入到嚟閂窗閂玻璃，你唔好嘈、唔好郁，郁我嗌救命，嗌非禮㗎。」
當中更有一條影片，李泳漢指是李家鼎去年6月向他求救，指自己被李泳豪兩公婆軟禁，連網上銀行密碼亦被更改，所以他沒有錢用，希望李泳漢給他送飯。當李泳漢趕到李家鼎家中，李家鼎稱怕被李泳豪兩公婆知道，不敢出門，李泳漢惟有隔住門與他對話：「點解你要咁聽佢講？係咪你唔聽佢話又要罰錢呀？啲錢轉晒佢Account呀？咁佢日日罰你都得㗎喎！佢根本搵藉口嚟攞你錢，同搶冇分別，你加佢名唔係Approve佢咁轉錢，咁係詐騙行為，我依家叫你行出嚟，你Stay喺度就愈多麻煩。」李家鼎即大叫：「我唔行得出去㗎，（你畀人軟禁咗喺自己間屋度？）係呀！係呀！（邊個軟禁你？）咪你細佬，（係咪李泳豪？）係呀，（同埋台灣婆？係咪佢兩公婆？）差唔多啦。」
除了「禁足」外，李泳豪亦不時在電話中大聲侮辱父親，在李泳漢提供的數條聲帶中，都聽到李泳豪如何辱罵父親，李家鼎一句都不敢駁。其中一條聲帶李泳豪破口大罵李家鼎成日講大話：「你最叻擘大眼講大話，講嘢冇公信力，事實擺在眼前，一毫子都冇嘅人（指李泳漢），唔係你畀係邊個畀呀？你真係侮辱人哋嘅智慧，你會唔知？你乜都話唔知㗎」
嚴控支出 畀幾多使幾多
另一段聲帶則是李泳豪寸爆父親做人處事：「我雖然就唔知你同我阿叔、姑姐係點樣相處，但到今日點解你哋咁唔Friend，我已經睇在眼內，心裏有數，或者你哋大家都有問題，但你都係好有問題，三叔有一句好啜核：『你老竇呀一世夠運！』講完㗎啦，其實真係喎，依你咁樣做人方法，唔係畀人打就唔會喺呢行撈。」
李泳漢又指李泳豪太太Agnes掌控了父親銀行戶口，李家鼎要將自己的錢花在甚麼地方也要得到她批准。聲帶中，Agnes毫不客氣對電話中的老爺說：「記住呀，你整車都要攞單，我要睇一睇張單上面幾多錢，先可以畀你。」Agnes對李家鼎所有支出一清二楚，更曾逐樣計算，指摘他亂使錢：「燈油火蠟水電一個月都唔會超過3萬，你唔好同我扮嘢喇，你所有啲數，我哋都同你計咗㗎，你自己都寫過出嚟，你每3日就半隻雞，你淨係鍾意食蒸雞，咁可以用幾多錢呀？你又唔出街，你呢個月使多咗錢，就係買多咗個手提電話，因為你自己掟爛咗部手提電話，你冇其他消費，總之，聽清楚16萬6千幾，就係你7月至11月嘅生活費。」
然後Agnes更教訓李家鼎：「我老公細個你點教佢㗎，畀你咁多就係咁多，你自己想用就自己想辦法，咁如果你冇錢仲碌卡，就要自己負責喇，你唔好唔記得咗，你嗰日趕趕趕，趕出去想撳錢，跟住你撞車呀，連個天都唔畀你做呢件事，你自己諗清楚。」
本文作轉載及備份之用 來源 source: http://hk.on.cc
|
鍾意就快D Share啦！
|
|
|
