現年41歲的藝人張致恒（Steven）與老婆雯雯育有4名兒子，近年不時被老婆在網上數落，負評不斷令形象大幅插水。不過，自去年起他投身藍領做搬運工人，多次被網民野生捕獲送貨，「大汗疊細汗」的自力更生形象，令外間對他的評價開始有起色。日前張致恒接受訪問，解釋不停生仔背後的原因，更激罕開腔多謝老婆。
張致恒近日接受內地平台訪問，他先談到當初被退圈時，並表示：「我係好唔開心，人係需要向前行，一直望住後面，永遠都唔可以發力向前跑。」以積極樂觀的態度面對。張致恒又分享現在的生活模式，每天早上6點半出門，下午6點收工，晚上9點上床睡覺，相當有規律，事關他坦言再捱夜就跟以往沒分別，會有黑眼圈之餘又沒有好狀態，同時又多謝老婆雯雯：「我都要多謝我老婆，大部分都係由佢控制。」他分享這樣的生活感受：「係辛苦、大壓力，但係我鍾意做人有呢種壓力，如果唔係我覺得枉過此生。」提到與老婆狂生小孩，張致恒解釋：「我係一個好傳統嘅中國人思想，屋企一定要熱鬧，屋企多啲人，起碼有啲咩事上嚟多對手。」
此外，張致恒之前提到湊二仔最辛苦，因為二仔患有過度活躍加自閉症，因此情緒難以控制：「5歲未識講嘢......而家仲更加辛苦，因為佢嘅情緒好難控制到。尤其佢一唔咬住個奶嘴呢就會發爛渣，就會周圍掉嘢可能會打人。」張致恒又解釋帶二仔出街，要面對別人的奇異眼光，並分享：「好似今朝早我帶佢返學佢咬住個奶嘴，有個婆婆同伯伯上巴士，佢望住『Jip』一聲，都唔知點樣做人阿爸嘅，咁大個仲畀奶嘴佢食，咁我個心係嬲嘅，人哋唔明白你小朋友係點樣。」
本文作轉載及備份之用 來源 source: http://hk.on.cc
|
鍾意就快D Share啦！
|
|
|
