「華星三寶」陳奕迅（Eason）、楊千嬅及梁漢文相隔10年激罕合體話當年，Eason大爆當年3人共用同一架保母車，千嬅每次最先上車卻最遲落車，戥對方慘慘豬，千嬅自言想不到多年後才驚覺自己蝕底，相當爆笑！
為紀念華星唱片55周年，華星特別開設頻道細談過去，最新一集邀得有「華星三寶」之稱的陳奕迅、楊千嬅及梁漢文受訪，是3人相隔10年再合體露面。講到難忘事，Eason指在保母車有不少回憶，由於當年3人經常一起做宣傳，加上公司節儉，他們要共用一輛保母車：「千嬅最慘，佢喺屋企化妝整頭，但架車第一個係接佢先，接完佢接梁漢文，再接我，因為我住香港島，好多工作喺香港區，而且公司又喺香港區，但係放工係第一個放低我先，千嬅係最遲收工。」千嬅聞言笑謂：「我聽到你講，我先發現自己原來咁慘，咁蝕底，但當年細個唔知咩叫蝕底，有工作做就做，你依家幾十年之後先同我講：『你蝕底』。」Eason又指梁漢文最出名是喜歡在車上開餐、飲奶茶，但從來不會把飲料弄灑。千嬅就回憶試過多人迫在同一架車上：「真係好似小巴咁，但架車都係嗰架7人車，所以大家要好瘦咁坐。」
談到「華星三寶」的由來，千嬅透露是由高層吳雨構思：「佢真係講煎釀三寶，想有個噱頭去宣傳，易啲搵廣告。」還憶述大家一起上電視跳《鳳陽花鼓》：「當年真係乜舞都跳到，依家已經做唔到，關節有啲事。」Eason則讚師兄梁漢文年紀跟大家接近，毫無架子，沒有前輩後輩的觀念。
談到華星當年結束唱片製作及營運業務，梁漢文指自己是最遲得知及離巢，他謂：「當時我喺沙漠拍緊戲，收到個短訊睇到報紙頭版先知。」千嬅表示當年也是懵然不知，直到被大老闆約談才知情：「係佢同我講唱片部門冇咗，話見我對公司好忠誠，一直冇嚟見佢傾將來前途，我當時係好驚訝，問佢：『完咗呀？冇得再出碟呀？』我真係唔知，以為換高層，佢話如果我想可以開番個Label畀我出碟。」
本文作轉載及備份之用 來源 source: http://hk.on.cc
|
鍾意就快D Share啦！
|
|
|
