近年備受力捧的無綫上位小花倪嘉雯（Carmen）去年將「最佳女新人」獎項收入囊中，近期更有《新聞女王》系列及《正義女神》接連播出；而在正熱播的《香港探秘地圖》中，她更首度「升呢」女二，同時又跨界成為《魔音女團》成員，事業穩步上揚。
近期不少藝人大爆入行初期遭遇前輩欺凌的慘痛經歷，Carmen堪稱「好運聖體」，合作對象皆是視帝視后級人馬，且對後輩極為提攜，故她入行至今從未嘗過被罵滋味，她透露在拍攝《新聞女王》時，自己大多時間只是站在後排，且台詞寥寥無幾，但視后佘詩曼依然會主動提點：「就算對住我呢啲『小薯』，阿佘都會提醒我可以點做、畀好多意見，真係一位好好嘅前輩。」至於在《香港探秘地圖》中與視帝黎耀祥（祥哥）合作，Carmen更直言毫無壓力：「祥哥完全零架子，幽默之餘又好照顧我，不斷提點我點樣走位。有次我趁佢休息，膽粗粗請教佢某場戲應該點演，佢都毫無保留咁同我分享。」
Carmen入行以來的角色均非常正面，她解釋這或許與她曾任3年兒童節目主持的背景有關：「好多人誤以為入咗兒童節目組就難以轉型拍劇，其實呢個係謠言。當時嘅監製超級好，非常支持我哋外借拍劇，唯一要求只係避免接演殺人犯、小三或過於性感嘅角色，正常劇集完全無問題，所以當年我都累積咗唔少拍劇經驗。」雖然形象清純，但Carmen強調自己對任何劇種都不設限，亦從未推過工作。被問到能否接受性感演出或激情床戲時，她大方表示：「若導演或監製覺得我勝任，我絕對樂意挑戰。不過可能因為我身形關係，比較少人搵我行性感。記得拍《正義女神》有一幕要稍微走光，導演都笑言拍得好辛苦，先勉強捕捉到少少效果。如果有劇情需要拍激情床戲，我都完全接受，因為我相信主創團隊安排呢類戲份，背後一定有其必要原因。」她續稱，現階段最渴望能多作嘗試，挑戰古裝、打女或反派等未曾涉獵的角色。
現實中的Carmen事業心重，感情生活亦與戲中角色大相逕庭。她在《香港探秘地圖》中，飾演一名極度「戀愛腦」的A0（未談過戀愛）女生，但她笑言現實中自己是「A1」（談過一次戀愛），但入行後便一直保持單身：「入行後雖然有異性接觸或約會了解，但最終都無發展成情侶。我對拍拖偏向佛系同理性，之前問過師傅，佢都話我嚟緊幾年無桃花，叫我專心工作。」Carmen透露自己思想較為遲熟，直到大學才迎來初戀。至於為何中學時期與戀愛絕緣？她笑指全因母親當年的「嚴厲家規」：「媽咪以前警告過我，如果中學拍拖，佢一定會攞住掃帚企喺學校門口，親手將個男仔『烹』走！所以當時就算有男仔追，我都一概拒絕。」
場地：頂好海鮮酒家
本文作轉載及備份之用 來源 source: http://hk.on.cc
|
鍾意就快D Share啦！
|
|
|