視帝馬國明、劉穎鏇、周嘉洛、朱敏瀚、戴祖儀、吳偉豪、郭柏妍、張馳豪、鍾柔美、倪樂琳和徐榮等，昨晚（26日）現身香港機場與在場觀眾一齊收睇大結局，《飛II》首周最高收視21.2點，首周觀眾人數高達136萬，成為2026年(截至6月) 首周最高收視劇集，以首周成績計算超越《正義女神》，成績理想。監製陳耀全表示第二周收視成績更好，馬國明提議最好找數就是開拍第3輯，劉穎鏇也表示開第3輯最有誠意，覺得今次合作非常難得，讓她接觸更多新事物。司儀陸浩明叫朱敏瀚除衫找數，朱敏瀚爽快除外套，着住背心騷麒麟臂，笑言：「拍劇成日喺機場當咗呢度係屋企，返屋企除衫係好正常嘅。」朱敏瀚並拉埋張馳豪和周嘉洛落水，但周嘉洛立即扣起衫鈕，不肯除衫。
馬國明受訪時稱是否拍《飛III》要問監製，認為觀眾反應很好，機場仲有好多感人故事可以拍，他說去過好多國際機場，覺得最好始終是香港機場，角色職位仍然有升職空間，若拍下輯可以管理未去過地方，管理停機坪也不錯。提到拍檔高海寧（高Ling）近日飛外地睇世界盃，馬國明取笑高Ling有錢，自言冇錢的他近日就密密接Job，透露昨日到廣州同蕭正楠和曹永廉為音樂會綵排，問今次是否加入跳唱環節？他透露確實在排舞，希望每次音樂會都有不同，3人中以蕭正楠跳舞最好，他和曹永廉就有進步空間。可有讓太太湯洛雯欣賞其舞姿？馬國明表示：「唔敢跳畀佢睇，佢應該知我跳舞方面冇乜進步空間，佢都無謂畀評語。」郭柏妍表示上一輯跟吳偉豪未有感情線，今集終於同吳偉豪happy ending很開心。表示暫時未有劇開，等待公司安排期間，會努力經營社交平台拍片，分享飲食和養生。
現場藝人各自搵粉絲合作抽幸運星玩遊戲，結果由朱敏瀚抽中大獎，認真有運。不過早前朱敏瀚就意外令戴祖儀撞崩牙，被祖儀要求負責任，昨日祖儀的門牙仍未修補，講笑門牙像一把刀，可以做刀的代言人，透露現在食雪糕會有痹痛，變了敏感牙齒，自爆自從撞崩牙消息曝光後，收到好多牙科診所主動聯絡願意提供幫助，但她希望朱敏瀚做個負責任男人，所以希望他能出醫藥費，朱敏瀚表示即時聯絡自己相熟的牙醫，願意會全數負責費用。祖儀稱他經常予以慰問，讚他是負責任男人。二人更對着鏡頭重演一次受傷經過，十分搞笑。
問朱敏瀚有冇曾經負過女仔？他笑說是第一次負了女仔的牙齒，真心內疚，重看片段發現真的是巧合，但冇負過女生，早前宣布回復單身後，他跟緋聞女友陳曉華關係降呢做回同事及冇再聯絡，惹來猜測分手並不開心？朱敏瀚表示已互相回應過，希望能告一段落，他說：「希望大家都健康和工作順利，唔好寫到是敵人，我哋唔係，希望大家都開心。（關係未能再進一步感可惜？）未來嘅事大家都意料不及，成件事係正面開心。」透露自己透過工作和運動保持狀態。
祖儀讚他除了高大威猛靚仔有型外，也非常善良和溫柔，故不需要以牙還牙，爆他最近拍打戲打到手腫，朱敏瀚表示戲中打人也有被打，開工一個月，現在寄情工作，同工作「拍拖」。
周嘉洛被問到縮沙不肯除衫騷肌，他解釋來到現場因為熱才打開恤衫衫鈕，之後感到冷氣太凍，笑言除晒不好看，露少少會更好睇，並非錫身是養身。若開第3輯的話，嘉洛講笑大家的角色應該升職，笑言可取代馬國明角色，因為馬國明都升職。
至於《愛．回家之開心速遞》中只有Terry留低接力拍新處境劇《三代同糖》，吳偉豪覺得：「公司決定都是為了劇集好，我哋拉低咗，所以唔預我哋。（有其他工作安排？）好似有劇開嘅！」嘉洛認為是最好安排，自己準備好隨時磿練，但最捨不得「媽媽」滕麗名和吳偉豪，近十年建立的默契，以後很難再有，現時《愛．回家》仍在拍攝中。
張馳豪此劇被發掘搞笑一面，他說之前演出的角色都比較嚴肅，今次演出令人有新鮮感，也希望向搞笑方向發展，直言：「學周嘉洛幾正，不過有啲嘢只有佢做先好笑，其他人做唔得。」大讚對方拍視頻有創意，戲言要向周嘉洛拜師。另外有網民指張馳豪日前在中環busking 狀態欠佳一事，他解釋前一日在茂名打籃球，身體有點不適，希望下次有機會再做好一點。
本文作轉載及備份之用 來源 source: http://hk.on.cc
|
鍾意就快D Share啦！
|
|
|