前無綫電視（TVB）資深監製兼戲劇組製作部經理梁材遠（人稱「材叔」）離世，終年75歲。梁材遠曾監製多套港劇史上經典之作，包括《誓不低頭》等，又策劃《茶是故鄉濃》、《酒是故鄉醇》等。視帝郭晉安與梁材遠曾合作多部經典港劇，代表作包含《誓不低頭》、《成功路上》及《城市故事》，郭晉安向東網表示心中直認對方為恩師：「係材叔畀咗個機會我去參與《誓不低頭》，令到我一炮而紅。當時我係做鄭少秋嘅仔「謝平安」，我都係喺一個學習階段，但因為呢套劇，我第二套拍嘅就已經係TVB一個力捧嘅新人、男主角，其後仲有同佢合作《成功路上》，之後就好少機會合作，但一路上都好想再合作。」
對於材叔離世，郭晉安感非常不捨：「對我嚟講，材叔係我一個恩師，我好感恩能夠遇上佢，令我事業上有好大嘅發展。佢嘅離開，我相信好多人都會好惋惜，希望材叔可以一路好走。」
鍾嘉欣與梁材遠多次合作，她向東網表示內心好難過，自己初入行已獲對方給予多個演出機會：「啱啱得知呢個消息，心好難過。材叔係一個好好嘅人。佢好親切，好溫暖，好容易相處。多謝材叔為香港影視圈付出嘅一切，亦多謝材叔喺我初入行嗰陣，畀咗我咁多機會，等我可以拍到《老友狗狗》、《金石良緣》、《蒲松齡》。材叔，願你一路好走。家人節哀順變。」
另外，藝人洪永城貼出與材叔慶生合照，並稱連續兩年同對方一齊過生日：「多謝材叔咁多年前畀嘅機會，你同你嘅名一樣咁親切、平易近人、你亦都用心提攜後輩，感激你為香港影視業貢獻半個世紀。多謝你，一路好走。仲記得連續兩年同你一齊過生日。#梁材遠金牌監製 #張保仔 #我瞞結婚了」
姚子羚晒出與材叔合作過的劇本，留言：「敬愛的材叔 很感恩能參與您的作品 由金石良緣、蒲松齡、情越雙白線、紫禁驚雷、造王者、情越海岸線到張保仔 謝謝您給我很多的演出機會 因為您，讓我在張保仔中炎貴妃的角色 拿下我人生重要的獎項 我會惦記着您那和藹可親的笑容 惦記着每次告訴我每個角色的內容 惦記着我經過的時候您向我問好 願您你離苦得樂 往生淨土 永遠懷念您🙏🏻🕯️🫶🏻#RIP敬愛的材叔」
鄭世豪：「材叔，多謝你，知遇之恩永誌不忘❤️🙏聽到你離開嘅消息，過往嘅畫面一幕幕浮現⋯當初承蒙材叔俾咗好多次入劇試造型嘅機會我。慢慢成長學習，直到《金石良緣》更俾我初嘗成為主線嘅家庭成員，喺劇入面嘅廠景有自己嘅家庭、有家、有房、有床，有事情發生…🥹呢些一步步累積嘅信任同機會，一直好珍惜。無您當年嘅賞識同提攜，就無後來的我。材叔，感謝您，一路好走。❤️🙏」
許家傑：「多謝材叔梁材遠先生 你係第一個俾機會我拍古裝嘅監製，到之後嘅火線下的江湖大佬入面既蛋撻 同 果欄中的江湖大嫂的葡撻 仲有街坊財爺嘅阿宗 每次見到你都係一個慈祥嘅微笑 諄諄教誨 令我由乜都唔識嘅小伙子 慢慢變成現在的我 感恩遇到您 一路好走 🫶🏻」
本文作轉載及備份之用 來源 source: http://hk.on.cc
|
鍾意就快D Share啦！
|
|
|