選美盛事《2026香港小姐競選決賽》今晚假將軍澳電視廣播城舉行，12位佳麗昨日進行泳裝綵排、試戴后冠及投票選出「友誼小姐」。李澄晴憑「無限零食提供」成功俘虜其他佳麗，大熱當選本屆「友誼小姐」，而盧蔚晴的民選票數由頭帶到尾，昨日更抽中試戴后冠，雖然上屆冠軍陳詠詩幫她「加冕」時戴唔穩，但她依然信心十足，勢擊退「魔咒」奪冠！
12位港姐候選佳麗昨日穿桃紅配綠色一件頭泳衣綵排，身材勝在均勻。李澄晴先拔頭籌成為本屆「友誼小姐」，不少佳麗難忘訓練期間她無限量提供零食，她表示：「其實係我較細心，照顧到大家，唔係用零食賄賂佢哋。啲零食係自己食，我鍾意買、食同分享，日日要受訓覺得好辛苦，所以食零食等自己開心番。」她更自爆因饞嘴而增磅：「肥喺大髀，我想減肥。未參選時肥啲，成50公斤，依家48公斤係最Fit，忍口對我有啲難度，好在平時有做運動。」又直言有信心打破「友誼小姐不入三甲」的定論。
年僅20歲的盧蔚晴在「網絡最強人氣Top 5」選舉中，連續多周登頂，昨日更抽中試戴后冠，成為焦點。根據過往歷史，抽中試戴后冠的佳麗多數大熱倒灶，盧蔚晴卻信心爆棚，即使「師姐」陳詠詩幫她戴歪了后冠亦沒問題：「相信聽晚都好似今日咁Lucky，我亦會披荊斬棘打破呢個魔咒。（唔捨得除落嚟？）都有啲。（戴得好唔舒服？）舒服，好啱我頭形。（戴歪咗喎？）都係一個造型啫，戴歪咗都冇跌落嚟！」她指經過約兩個月訓練後，一眾佳麗已脫胎換骨，更搞爛Gag表示：「我都啱啱『脫』咗件衫，着住件泳衣上台，哈哈！」提到經常在網上分享夜蒲照，她解釋只是朋友約會，目前忙於選美已沒夜蒲，並承諾當選後會戒蒲。
李澤欣獲師姐睇好
大熱的李澤欣獲冠軍師姐陳詠詩點名讚賞，她開心表示：「多謝，承佢貴言信心不嬲係自己畀自己嘅，有佢嘅祝福，希望明晚有更好成績。（票選一直畀盧蔚晴壓住？）聽晚唔壓住咪得囉，大家可以平排企，好似依家咁樣，畫面幾好睇。」她又透露近日少用手機，未與男友保持聯絡，對方亦未獲邀到場觀戰：「我點講佢都唔會嬲嘅，我成功等於佢成功嘛。」而袁絲珩主動提到在觀眾票選名次有進步：「我都自信心爆棚，所有環節都有信心。我有好豐富嘅舞台經驗，所以決賽舞台就係我主場。」
至於鄧匡閔及顏懿菲狀態大勇，反觀魏欣似乎體力不支跌Watt，但她連聲否認：「今日好精神喎，可能唇膏唔夠，我仲係好Sharp。（觀眾票選你跌咗一位，有冇影響信心？）太多嘢要準備，冇乜心情諗其他，唔會畀其他人影響。」鄧匡閔指比起上次穿泳衣時長胖了一點：「上次瘦得滯『凹相』，肥番少少係最弗狀態。（對自己身材有信心？）梗係，係我嘅賣點喎！」她與顏懿菲又異口同聲大讚李澄晴得獎實至名歸，但搞笑指未知是否因食得太多對方提供的薯片而作病：「其實係自己為食！」
另外，一眾佳麗的網絡影片在決賽前夕，錄得逾3,780萬總瀏覽量，較去年整屆賽事（包含決賽）的總瀏覽量錄得近130%驚人升幅，其中盧蔚晴的打碟才藝表演影片，在社交網播放量更超過110萬。
李尹嫣脹爆 陳詠詩拋胸險仆
2025年港姐冠軍陳詠詩及「最上鏡小姐」兼「友誼小姐」李尹嫣缷任在即，昨日穿上低胸裙亮相，陳詠詩的晚裝更凸顯其爆乳身材，不過因裙襬過長一度被李尹嫣踩到，兩人齊齊撠一撠，場面驚險，為免再出意外，李尹嫣之後索性拉起其裙尾。
負責頒發「友誼小姐」獎項的李尹嫣滿額暗粒外，身形更脹了一個碼，她表示：「瞓得唔好、皮膚乾，青春囉！（身形脹爆喎？）少少啦，咁又冇Double一個碼咁誇張，天生肥底啫。（係咪開心食多咗？）都開心嘅，因為卸任嘛，講笑啫！」她表示想嘗試拍古裝劇，但被指現時身形只可演楊貴妃，她笑說：「知楊貴妃係邊個，仲可以增肥添！」而陳詠詩不覺得自己特別性感，讚師妹個個都靚，沒有搶鏡。她指卸任有少許不捨，同時亦為新一任港姐誕生而感到興奮，問到可有心水佳麗？她睇好大熱的李澤欣，李尹嫣則喜歡氣質出眾的袁絲珩。
本文作轉載及備份之用 來源 source: http://hk.on.cc
|
鍾意就快D Share啦！
|
|
|
