《拉闊音樂會 她和她的秘密 衛蘭 × 炎明熹》昨晚（29日）假亞洲國際博覽舉行，炎明熹（Gigi）與衛蘭以白色裝束配合羽毛頭飾上陣，合唱美國音樂人JVKE的《golden hour》，為音樂會揭開序幕，衛蘭獻唱《就算世界無童話》，期間當兩人獨唱時，又互相化身攝師捕捉對方及台下觀眾。其後Gigi以Bra Top配牛仔裝騷纖腰跳唱新歌《Bye Bye Bye》，唱畢後她終於開腔跟觀眾打招呼：「大家好嘛？大家食咗飯未？鍾唔鍾意頭先嘅跳舞？」此時，衛蘭也換上流蘇裙騷腿出場，她見到Gigi即伸手摸對方的腰，笑言：「見到佢個肚肚就想摵佢！」Gigi尷尬指衛蘭很愛捉弄她，兩人齊跳唱《Little Magic》點燃全場氣氛，Gigi形容為「世紀大合跳」，隨後兩人又換上黑色連身裙，襯對絕。
尾聲時，屏幕上播出兩人的訪談短片，大談對方的印象，衛蘭稱覺得Gigi好乖、好高、好緊張、好怕醜及好單純，而Gigi指衛蘭是一位很照顧人的姐姐，又自認兩人性格有點似，做事非堂認真，想向對方說聲多謝。
而在「神秘歌曲」環節中，二人要藉歌曲向對方表達愛與感謝，Gigi笑言：「呢個拉闊有少少衰，因為準備咗一個位，我哋唔知要唱乜歌畀大家，就連綵排同試聲都係分開我哋，我想送《Angel》畀佢，因為佢好似天使好sweet同畀到我鼓勵，同時想用首歌鼓勵佢，希望當佢唔開心時，會好似喺天使臂彎感到平靜及舒適。」之後輪到衛蘭，Gigi趁衛蘭調整結他時，自爆在對方家中練習時，對方突然問她「要不要收養蜥蜴？」並送了一條蜥蜴給她，之後衛蘭以結他自彈自唱Lady Gaga的《Million Reasons》，她稱：「呢首歌係我同你好特別嘅回憶。」該曲正是Gigi於2021年參加《聲夢傳奇》時跟導師衛蘭的合唱歌，Gigi未幾已跑開取紙巾並背對觀眾抺眼淚，衛蘭問她去了哪，又謂：「你唔好喊，會搞到我。」唱畢後，衛蘭坦言：「係我榮幸可以同你一齊做呢個騷，好興奮見到你嘅音樂事業盛放，你為呢個年代嘅觀眾做個好榜樣。」最後兩人合唱《Somewehere Only We Know》為演唱會畫上圓滿句號。
騷後兩人接受訪問，Gigi稱音樂會上要演繹衛蘭的歌，大感壓力：「啲歌好難唱，好在我哋好早開始練習，所以好好多，佢特別約我一齊練習，好有鋪排同計劃，令我個心定好多。」而Gigi到衛蘭家中練習時更獲對方送贈蜥蜴，衛蘭坦言很多朋友都不接受爬蟲類，指對方是一個很特別的女生，連蛇也不怕。提到在音樂會上衛蘭難得跳舞，她稱練習了很多遍，Gigi讚對方很着重細節，衛蘭自言相隔4年後，將於11月在紅館舉行3場演唱會，她預告屆時會再次挑戰跳舞，還會有全新編排，跟內場個唱完全不同，但嘉賓方面仍未有心水。
談到當衛蘭唱出《Million Reasons》時，令Gigi爆喊，Gigi指完全想不到衛蘭會選擇這首歌：「呢首歌對我有好多故事，當年參賽時我哋一齊合唱過，以前我參加比賽都會唱呢首歌。」衛蘭回想當年在《聲夢傳奇》合唱這首歌也是Gigi提議，大讚對方當時只有十多歲，要面對眾多評判，相當叻女，對她引以為傲。至於同是聲夢出身的姚焯菲也同時開騷，Gigi表示有互送花籃及互講Good Show鼓勵大家。而昨晚Gigi其中一套舞衣露纖腰，她自言沒有刻意操弗或節食，但開騷當日就未有進食，她笑言待會要暴力對待自己的身體狠狠吃一頓。
另外，早前Gigi擔任MIRROR人氣王姜濤的演唱會嘉賓，她直言有點對不起他：「因為表演嘅時候，我有少少甩咗，要佢幫我補番，所以我寫咗封信同佢道歉，因為我好鍾意睇粉絲信，覺得好有溫度，希望手寫信可以畀佢感受到我嘅誠意，佢事後都有回覆我話Thank you。（點解你叫佢姜先生？）因為唔知點叫，佢又冇英文名。（會唔會再合作？）如果大家鍾意我會爭取，如果有緣分就會一齊表演，要有機會先。」
本文作轉載及備份之用 來源 source: http://hk.on.cc
|
鍾意就快D Share啦！
|
|
|
