點擊下圖看各參賽者照片：
方健儀著重咬字及外表整齊端莊 陳啟泰笑言揀主播似揀新抱
談到挑選參賽者的標準，方健儀表示看重咬字、對新聞行業的熱誠，以及整齊端莊的外表，她更自嘲：「外表唔一定要靚，我成日都話睇我就已經知，我唔係一個靚嘅人，但係都做到，所以就唔需要話要好靚好靚，但係我覺得係要整齊，要乾淨端莊大方。」Ken哥則笑言自己揀主播像揀新抱、揀女婿：「唔係講笑，觀眾緣係好緊要，譬如話我哋呢個年紀，如果我有小朋友，都要揀女婿揀新抱，你要真係入到屋，你要見到佢開心、舒服，唔使一定好靚，但係一定要見到佢有一種好舒服嘅感覺，冇壓力先至得。」方健儀即打趣問他當年看自己報新聞有冇「新抱感」，Ken哥笑回：「我未到嗰個年齡可以睇新抱，淨係覺得『嘩！勁！呢個新聞女王勁！』」
面試幾秒靠自信建立公信力 穿得太隨意立即扣分
兩人又指面試者的第一印象極為關鍵，會直接導致加分或減分，方健儀：「成日都講幾秒公信力嘅建立，其實真係行入嚟嗰吓已經見到腰板挺唔挺直、有冇自信，嗰吓已經贏咗一半，再加埋一開口嘅時候見到佢哋語文能力好好，英文甚至乎外語，有泰文、日文、韓文，嗰啲已經好高分。」她說有人以為主播只需坐著報新聞，但如果有特別技能、瓣數夠多，其實也隨時有機會大派用場。之後Ken哥特別提醒，千萬不要以為自己「Overdressed」（衣著過度正式），直言：「好多人第一次嚟面試嘅時候，着得好casual，減分！即刻減分！我哋提咗佢之後，大家着返正裝，有返件恤衫，打返呔，女士着返啲裙，着返少少嘅高踭鞋，唔好太高，太高又唔得，永遠唔會太過overdressed，你而家嚟面試喎！」
閻小姐普通話自我介紹惹議 二人指廣東話能力仍是必須
HOY在社交平台上播出部份參賽者的面試及參賽片段，其中來自重慶的網絡紅人「閻小姐」閻佩萱講普通話自我介紹引起熱議，有網民認為「連廣東話都未講好，談何做主播報新聞？」問到講廣東話是否做主播的基本條件，方健儀說HOY有不同語言的節目，英文、普通話、廣東話，每個語言都需要不同人才，建議閻佩萱想在香港發展的話，可考慮普通話新聞報道。她指既然《我要做主播》是香港選秀節目，當然都會注重廣東話能力，倘若識得更多語言，例如：日文、泰文、韓文都會加分。Ken哥則表示兩文三語在香港是必須，談到自己自學普通話的經歷，鼓勵大家多學語言：「我30幾歲因為要做主持，被逼要學，喺亞視嗰陣時，逼我要講普通話，嗰時覺得好大壓力，後尾逼逼下又覺得OK，終於我喺十幾年前，幫央視做過一個『秋晚』，係全普通話，係有用㗎！唔會話多咗，呢啲嘢永遠可以用得返，咁梗係多啲好！」
回應Threads內定造馬指控 方健儀：我哋冇份畀分
早前有自稱節目幕後人員在Threads爆料，指節目有內定名單、參賽者答題時公然作弊、陳啟泰擺款背唔熟稿等等，方健儀坦言自己很早已看到該帖文，第一時間向幕後求證：「我話『喂，係咪宣傳伎倆，你曲定直？』佢話『我哋都唔知』，所以我第一下以為係宣傳嘅手法，但係似乎問過佢哋就唔係。」她表示二人只是主持，根本沒有評分權力，有時參賽者被淘汰了她和Ken哥都是後來才知道，又謂：「第一我冇份去評分，第二有時我都會覺得，我哋都要尊重或者欣賞返各個參賽者嘅努力。當然我哋每個電視台好多嘅選秀，好多比賽，每次比賽嗰個結果出嚟都可能有唔同嘅討論，但係我哋都唔好抹煞我哋每一個參賽者嘅努力，但係最終你話有冇一啲內幕嘅嘢，我哋兩個好肯定咁講我哋冇份參與，我哋冇份比分！」
陳啟泰感謝對方幫手宣傳 笑言：唔係大台都有咁多媒體關注你
至於針對Ken哥工作態度的部份，他說自己沒有Threads帳戶，接到記者查詢時才知道此事，但他完全不介意，也向記者表示沒什麼需要澄清，更感謝對方免費宣傳：「我話我唔知喎，冇喎，我真係唔知同埋冇，但係我真係好多謝嘅就係，因為我哋並唔係喺大台做節目，我自己亦唔係咩大節目主持人，有咁多媒體關注你，肯同你做宣傳，其實好多時呢啲喺大台先會發生，竟然而家我同Akina合作做呢個節目，咁老正嘅，有人幫我哋炒作新聞，係好難得！喺咁多個節目當中要跑出嚟，並唔容易，有啲咁嘅宣傳，我真係唔係太介意，亦都好感謝。」他更搞笑補充：「但係如果開續集嘅話，我哋一定會控制啲參賽者嘅生死存亡，一定會有造馬！一定態度更差！」
方健儀力證陳啟泰背稿一字不漏 Ken哥自豪從不依賴提字機
對於Ken哥被指態度不佳、背不熟稿，方健儀用「離譜」形容，大讚：「佢唔使點準備都可以好流暢咁樣講啲好複雜嘅稿。」她透露自己在節目主力陪參賽者訓練、實習，Ken哥則負責控制大局：「好多規則嗰啲嘢，好複雜嗰啲遊戲邊個篩邊個、畀咩分，佢完全可以一字不漏咁樣講晒出嚟，其實伍家謙都喺度、潘蔚林都喺度，佢話『嘩！阿Ken真係好堅！』」方健儀說自己視Ken哥為學習對像，Ken哥先是笑說：「你冇留意我AI眼鏡入面有投射嘅咩？」之後再解釋因為自己是主持出身，背稿背了幾十年，一直都冇依賴提字機：「我係近年出街拍嘢先有導演話『睇唔睇提字機？』我話『有提字機咁好！你早啲同我講！』所以咁多年我哋仲未睇過提字機，最多都係間唔中有兩句大字報提一提我哋，做主播有個好處，佢哋有提字機，但係我覺得兩樣嘢都要配合，有啲好正經，好多嘢記嗰啲咪需要。」
七位主播夢幻同框 方健儀：我年資少過張文采林小珍㗎
此外，談到早前林小珍在社交平台分享七位主播拍攝節目時的合照，包括丘靜雯、余琦琪、張文采、林小珍、黃潔慧、麥詩敏以及方健儀，被指是「跨時代世紀合照」，在網絡上迴響甚大。方健儀則澄清：「其實我哋同一個世代㗎！我哋同一個Generation！我係年資最淺㗎，我嘅年資係少過張文采同埋林小珍㗎，我報得五年新聞咋嘛，但係佢哋都係十年或以上，所以啲網友我見到都好笑，啲人話唔同世代，論年紀當然係我最老，但係論年資我係最Green嘅。」她感歎主播因為輪更及外訪，過往即使效力同一公司也極難碰面，上次大規模聚會已是她離職Farewell當晚，與十多位同事去旺角食宵夜，今次難得有機會在同一空間聚頭，實在是美好回憶。然而，回憶再好也難以打動方健儀重出江湖再坐主播檯，她笑說試過就算：「冇啦，我太老喇！佢哋（參賽者）咁後生，好現實嘅，喺香港係好難容納到好似一啲我呢個年紀嘅新聞報道員，喺外國CNN、BBC嗰啲係得，但係香港始終文化唔同，所以如果去到我呢一個嘅年紀或者呢個階段，應該都係做幕後比較適合。」Ken哥隨即在旁總結：「而家佢嘅舞台唔係主播枱，係江湖！」
本文作轉載及備份之用 來源 source: http://www.hk01.com
|
鍾意就快D Share啦！
|
|
|
