香港樂壇殿堂級填詞人黎彼得昨早（5日）離世，享年76歲。曾於70年代成歌神許冠傑的「御用填詞人」，合作創作出金曲無數，當中就有《浪子心聲》、《打雀英雄傳》、《梨渦淺笑》、《夜半輕私語》、《財神到》、《賣身契》、《世事如棋》、《學生哥》、《杯酒當歌》、《加價熱潮》等，亦曾為多位天王巨星創作，如張國榮的《Monica》、《第一次》；譚詠麟的《天邊一隻雁》、《愛人·女神》；梅艷芳的《將冰山劈開》等詞作，到現在仍是歌迷心目中經典。
黎彼得與許冠傑當年合作無間，成為最佳曲詞組合，由1976年的《半斤八兩》專輯，至1982年的《難忘你·紙船》，二人共合作過7張專輯，因歌詞內容通俗易明兼貼地，大受樂迷歡迎，當中聯手合作金曲《浪子心聲》更是經典之作。不過黎彼得同許冠傑合作7年後拆夥，更傳出關係決裂。
黎彼得曾親解與許冠傑之間恩怨：「我應好多網友嘅要求，就想知道我同阿Sam、即係許冠傑嘅恩恩怨怨。其實呢恩就多，怨就好少喇，你哋啲人梗係話我擦鞋啦，其實一啲都唔係擦鞋，點解呢？因為逢親咩朋友都係，只要大家太過close，就一定有啲恩恩怨怨。至於阿Sam有冇怨我我就唔知，不過我對佢就非常之感恩，呢個係我嘅恩公、恩師，呢個不能夠否認，大家都知。」
黎彼得澄清：「之前有人話知道晒我哋啲嘢，有乜可能會知呀，全部都係斷章取義，又話阿Sam老婆唔like我，又話我話佢老婆唔係人，全部都係不知所謂，但係我唔能夠話樣樣都駁咀，因為你愈解釋就變咗掩飾，係咪真係唔啱，我又費事講到咁乜，因為求真其實大家好痛苦嘅。」
黎彼得曾談及與許家關係，大讚許家家庭和睦，又透露當年與許冠文因拍攝《丐世英雄》而變得熟落，大讚對方是愛妻號，他又笑言許冠英非常貪玩，與許冠傑兄弟關係很好。至於許冠傑，黎彼得大讚他同樣十分愛錫老婆：「你知佢啦緋聞又少，就係因為佢對老婆好，老婆又錫佢，啲人話佢老婆話呀，你呢個損友教到佢老公由以前唔飲酒唔食煙嘅，自從同你熟咗之後呢，又食雪茄又飲紅酒，擺咗我上枱喎，關我鬼事咩其實！不過算啦，如果佢認為係關我事，就當係我啦，有乜所謂呀食吓雪茄仔，飲吓紅酒更加係情趣。至於話佢老婆唔鍾意我，多餘啦，佢老婆鍾意到我不得了，佢老婆有時整牛扒畀我歎，又同我去食牛扒。」
黎彼得續指有人質疑他不會講英文，如何同許冠傑老婆溝通？他即強調自己英文水平沒問題：「我英文係好掂，我寫係唔得，不過講就OK。」黎彼得大讚許冠傑對朋友很好，所以身邊的朋友都好好，只是兩人興趣不同：「佢平時嘅嗜好呢就係jam吓歌、玩band呀，冇乜其他娛樂。但對我嚟講呢，我就認為同我唔夾，因為我好憎陽光與海灘，所以同佢呢樣嘢就唔係好啱喇，大家道不同不相為謀，並唔代表有敵意，不過各自各精彩。」
本文作轉載及備份之用 來源 source: http://hk.on.cc
|
鍾意就快D Share啦！
|
|
|