元朗前日發生恐怖慘劇，兩隻小狗在街上被一隻巨型犬咬死，事件震撼全城，亦引起圈中大批愛狗人士關注。其中陳庭欣感同身受，因其愛犬早前在街上亦慘被狗咬傷，屁股皮開肉爛，要即晚接受手術。而關嘉敏與森美帶狗狗外出時，曾分別遇上野豬及蛇，幸好未有出事，自此一定用狗繩！
前港姐冠軍陳庭欣（Toby）向來愛心爆棚，除飼養鸚鵡外，家中還有狗狗「Winter」及「一姐」，談到「狗咬狗事件」，她直言心情受影響：「之前我唔喺香港，家傭姐姐帶『一姐』落街，點知附近有隻守門犬衝出嚟咬佢，好彩隻狗好快放口，但『一姐』傷口已經好深。當時我只能透過視像了解，有個鄰居讀緊獸醫，佢就教我爸爸處理。」當晚「一姐」接受手術後不停哀鳴，由家傭姐姐陪伴至清晨才安靜下來，令Toby心痛不已：「佢用咗一個月時間先至好番晒，我仲擔心佢以後唔畀人摸Pat Pat，點知又冇喎！」
至於年前被愛犬「通仔」抓傷面部而一度停工的姚子羚，事後對愛犬仍不離不棄，她對「狗咬狗事件」感到十分傷痛：「放養唔一定係好，狗仔最無辜，因為佢哋嘅行徑視乎主人點教導同照顧。」13歲的「通仔」現時體重超過20kg，子羚表示每次落街一定會上繩：「仲要保持狗隻嘅社交距離，咁對佢同其他狗都最安全。」不過再小心亦有機會遇上意外，她說：「有次一個家傭姐姐拖住兩隻狗，點知其中一隻條繩斷咗就衝埋嚟，好彩有人幫手，即刻喺地下噴水阻止先冇事。另一次係我個家傭姐姐帶狗上街，附近有隻放養嘅狗想咬我隻狗，家傭姐姐即刻擋住，搞到傷咗，因為嗰隻狗唔係第一次，我就去同佢主人理論，之後就冇再放養喇！」
莊思明放繩釀「血案」
莊思明與老公楊明視愛犬「Haru」如家人，早前更一同影結婚相，思明表示看到慘劇很傷心，透露曾因「放繩」出事：「我試過喺一段冇人嘅山路放繩畀隻唐狗跑，點知遇到一隻大狗，佢哋打交整傷咗人哋隻狗，我都好內疚，從此隻狗出街都會戴口罩同一定唔會放繩！」
對愛犬「Two Two」錫到燶的關嘉敏，同樣覺得上繩很重要，她說：「主人有時覺得好熟悉自己嘅狗，但狗狗可能受到某啲氣味或環境影響觸發情緒，所以綁繩好重要，有時可以用埋口罩防止意外發生。」原來她亦發生過驚嚇事件：「試過同狗狗去郊外，見乜人都冇，周圍又有圍欄，諗住好安全，咪放繩等佢跑吓，點知突然有隻野豬，『Two Two』仲要行近佢，好驚佢哋打交，好在野豬當我隻狗冇到，嗰次驚魂之後，我一定用狗繩！」
Ian AK一定拖繩
黃宗澤亦揚言一定會拖繩：「呢件事我唔係好清楚細節，唔敢講隻狗受乜影響，係咪有人棄養令佢失常呢？主人當然好大責任，有責任管好自己隻狗，有攻擊性嘅話就要諗辦法喇！」而森美視多年前收養的一對玩具貴婦狗如心肝寶貝，他帶狗狗行山時亦遇過「不速之客」，他說：「試過帶去行山，點知有蛇，狗仔可能唔知有危險，佢本能就會吠，所以我一定會用狗繩。」並呼籲狗主自律。
另外，男團MIRROR當中亦不乏愛狗之人，養了哥基犬「雞髀」及臘腸狗「芝麻」的Ian說：「帶狗出街會小心，因為有陣時未必迅速控制到佢哋，狗繩一定要有。有時佢哋興奮，玩起上嚟周圍跑好危險，路上多危險嘢發生。」好兄弟Anson Kong亦大表認同：「喺特定地方，同埋對自己隻狗好了解同好有信心，先好鬆狗繩。」數年前他曾因救小朋友而被狗咬傷手指，更傷及神經線，但無損他對動物的熱愛，最近再收養多一隻狗狗。
本文作轉載及備份之用 來源 source: http://hk.on.cc
|
鍾意就快D Share啦！
|
|
|