資深演員劉兆銘（Ming Sir）尋日（2日）離世，享年94歲。近年由於年紀漸大，Ming Sir逐漸減產，加上其太太張慧玲在2012年因癌病病逝，有一段長時間都因心情不佳而推掉工作，最終闊別螢幕5年後，於2017年參演劇集《賭城群英會》及在2020年、88歲時出演ViuTV劇集《嘆息橋》後，便絕迹幕前。Ming Sir用情至深，太太離世令佢一度意志消沉，拒絕再演戲。
Ming Sir太太張慧玲於2007年發現患癌，Ming Sir隨即半隱退演藝圈，將大部分時間用於陪妻子抗癌，無微不至地照顧對方。2012年，太太因癌病於醫院病逝，享年72歲。對於愛妻逝世，Ming Sir悲痛不已，極為不捨。張慧玲離世翌日，心碎嘅Ming Sir曾獨自走到山上摘咗一撮草，親手結成草環並拍照放紀念冊中，以「結草為盟」紀念兩人半世紀嘅結髮之情。
經歷喪妻之痛嘅佢更自此失去工作動力：「以前太太成日跟住我做嘢，自從佢離開咗後，我覺得失去咗一半對工作嘅嘢，嗰樣唔係叫做興趣，而係唔知仲做嚟為乜。我覺得佢已經唔喺度，唔做（演戲），我覺得當係懷念佢，我唔演戲，就好似人哋守靈咁。」直到2017年，他才在好友鼓勵下重出江湖接拍《賭城群英會》。
一向對食講究又挑剔嘅Ming Sir，亦於太太離世後開始茹素逾10年，深感冇太太在旁與自己共享，美食再無意義，不如一切從簡。Ming Sir又曾透露，太太生前係佢最忠實嘅影迷，每一部劇、每一部電影都會站於觀眾角度為其評分，甚至會到片場陪佢拍戲；私下打麻雀時，又會喺佢身後幫忙「埋單」。Ming Sir亦曾表示，太太臨終前最掛心佢無人照顧，曾希望「死在夫後」，臨走前更特別叮囑佢再搵一個伴照顧衣食住行。然而Ming Sir早已下定決心，此生絕不再搵伴侶，用餘生守護對妻子唯一嘅深情。
本文作轉載及備份之用 來源 source: http://hk.on.cc
|
鍾意就快D Share啦！
|
|
|