藝人吳沚默（Momo）曾為多套TVB劇集包括《老表》系列撰寫劇本，加上外形斯文出眾，係圈中公認才女，而近年佢跟住大趨勢將事業重心轉移內地橫店，積極進軍網絡短劇市場，主演埋短劇《姐姐的反殺時刻》，平台播放量火速破億！但原來所有風光都係有苦自己知，吳沚默拍片大談自己橫店經歷，包括胸有成竹嘅試鏡失敗、導演「潛規則」暗示等，逐步揭開行業陰暗與辛酸。
吳沚默近日接獲選角導演通知，原本一個「志在必得」嘅角色已經定角，但人選唔係自己：「即係我落選了…」佢透露先前見導演時已經傾咗好多關於角色嘅心理、層次等方面，且自覺現場發揮良好，甚至回程途中已開始預留檔期，豈料最終仍收到「Sorry呀，唔係你呀」訊息。好在吳沚默心態好，直言演員落選同被拒絕係常態。佢透露橫店雖然地方不大，但競爭極其激烈，自己每日都要孭住背包去各大劇組叩門、投演員資料：「如果經理人得閒就陪我，唔得閒就我自己一個去每一個組敲門。一日可以跑四、五、六個組，但大多時候只係遞演員資料、介紹自己，之後就離開冇下文。」
吳沚默坦言有啲劇組地點非常偏僻，去到已經閂門或者根本搵唔到籌備地方，所以佢經常喺影視村迷路：「咁如果你可以得到試戲嘅機會已經係好難得㗎，即係畀個劇本你，現場咁試演一段戲，如果可以咁樣嘅話，我哋梗係開心啦，因為可以令導演見到你嘅表現。」不過，吳沚默坦言唔少劇組其實早有「內定」安排：「有啲選角導演會好誠實同你講，我想同妳合作，但係呢個劇本冇合適你呢個年紀嘅女性角色；甚至有時去試戲都只係行個流程，因為角色實際上已經內定咗。」
吳沚默身處橫店三個月裏，佢都遇過唔太開心事同「很差的人」。佢曾面試一套電影時，籌備地方係酒店會議室入面，當時佢同導演、監製及製片人傾談甚歡，到晚上約10時，當佢沖完涼後，竟收到該導演微信訊息：「叫我去嗰間酒店同佢傾吓劇本！」吳沚默即時拒絕並詢問能否改為「白天傾」，幾秒後對方打嚟，對面係一名自稱「導演妹妹」嘅女子：「我係導演阿妹呀，你放心過嚟啦，好安全㗎，我哋全部人喺晒度㗎，你驚咩啫？」吳沚默再次堅拒，隨即激怒該名似已喝醉嘅導演，對方於電話中怒罵完再Block埋佢，吳沚默直言：「其實你話危不危險？我覺得係唔危險嘅。只要你唔去，冇人可以傷害到你，但呢啲人真係好差囉。」
同時，吳沚默都有遇過好劇組，於現時行業大環境欠佳、成本很低嘅情況下，仍然尊重演員及表演：「遇到咁嘅劇組我真係會好珍惜，就算片酬再低，我都會願意去，因為我好欣賞喺自己崗位，將自己啲嘢做好嘅人，如梳化、攝影助理等，只要佢表現得好專業，同埋好尊重佢份工，我都會好尊重佢。我相信呢個行業係有啲咁樣嘅人存在，先會令到大家堅持落去。」吳沚默更一度講到眼眶濕潤、情緒激動，雖然當前情緒略帶失落，但會收拾心情，專心投入劇本創作及等待下一個適合嘅角色。
本文作轉載及備份之用 來源 source: http://hk.on.cc
|
鍾意就快D Share啦！
|
|
|
