前女子組合Cookies成員傅穎（現名傅寶誼）早前重提昔日慘遭隊友集體排擠的往事，有網民炮轟是傅穎性格缺陷，而該網民事後被揭原來是鄧麗欣的圈外朋友，今日鄧麗欣出席活動時親自回應，表示以往對是非新聞都希望盡量不想回應太多，不想是非一路輪迴下去，但因為今次件事涉及一位朋友，所以要清楚講番呢件事：「關於朋友在網上留言呢件事，我的朋友所有行為和言論完全不代表我的立場，雖然係朋友，但佢是成年個體，佢選擇言論不代表我，我見到留言都好詫異，有少少覺得失望。朋友是圏外人，我覺得有必要代佢向受呢件事影響的人致歉，大家畀番空間佢，始終佢係圈外人，之後都有向我道歉，佢知道做錯。」
她認為好多時人會受到情緒衝動做錯事，雖然朋友已道歉，都事情已經發生。問事件有否影響同傅穎的感倩？她說：「就呢件事，關於呢啲新聞太多太多，講咗好耐，我嘅態度係唔需要解釋太多，認識我嘅人，同我做過嘢嘅人，知我為人點，覺得唔需要解釋太多無謂嘅嘢，希望呢件事講完，唔好再講再滾下去變成愈來愈誇張扭曲。（會否同傅穎三口六面講清楚？）每個人嘅選擇，件事好多好多流言蜚語，我心態好少去睇，叫粉絲就算幾想支持我，都要忍住唔好參與罵戰，因為會令件事愈來愈複雜。（件事影響到你？）認識我的人就知道發生咩事，入行咁多年，所有工作行先，其他嘢唔想講。」
有網民整理傅穎所述的欺凌時間表，批評鄧麗欣有參與其中？她表示：「就呢啲字眼，網上太過分和嚴重失實的指控，係非常嚴重，公司已經存檔，係會交律師處理。（傅穎曾經同你講番被欺凌，你回答唔知呢？）我唔記得有呢段對話，但我幾肯定我回答一定唔係呢種語氣。（有指區文詩涉及欺凌傅穎，你有冇了解番？）發生太耐，其他成員都各自生活，自己喺呢行自己會面對，唔想煩佢哋太多，因為佢哋唔喺呢行。」
另外，近年積極投身藝術創作的鄧麗欣，今日現身藝術展同時帶來三幅親自創作的畫作展覽，她在台上表示早前到尼泊爾探訪，接觸不少尼泊爾小孩，拍下很多相，回港後她覺得他們的表情動作好像在說故事，眼神充滿希望和溫度，於是她便用藝術作品呈現出來，她希望透過畫作傳達愛的訊息。她說近來工作忙碌無時間作畫，透露早前飛台灣拍攝新歌MV，第一次出外拍MV，今次全部台灣團隊，是電影《金都》的團隊，合作過多次，甚有默契，拍攝好快過程順利，希望將來能夠再合作。她又透露有傾緊劇本，暫時十劃都未有一撇。問到男友是否同行？鄧麗欣甜笑表示：「佢最後有嚟，本身佢每個月都返台灣一次探屋企人，所以順便探埋我。（見家長？）一早見咗佢媽咪係冇乜所謂嘅人，覺得我哋開心就可以。」問到男友家人有沒有催生小孩？她說台灣人不會這麼直接：「我鍾意小朋友，玩人哋的小朋友先。」
本文作轉載及備份之用 來源 source: http://hk.on.cc
|
鍾意就快D Share啦！
|
|
|