星級港將蔡俊彥於劍擊男子花劍過關斬將，尋日（22日）取得銀牌創個人亞運最佳成績，稍後仍有機會於團體賽再爭逐。即使蔡俊彥落力出賽為港爭光，點知仍有網友對其出言不遜，有網友抨擊蔡俊彥，諷刺佢「發明星夢」，又有口臭網友留言狂寸蔡俊彥「全死角」、「五官各走各路」等，一時間英雄變出氣袋。當中男團MIRROR成員呂爵安（Edan）係蔡俊彥死黨，每次出事都幫口力撐到盡，點估到佢會出口當眾「攻擊」好兄弟！
愛上網同大眾互動嘅蔡俊彥，面對有網友對佢作出人身攻擊，佢高EQ回覆：「今日贏咗銀牌，有獎金，可以整容，yeaaaaaaaaaaaaaaaaaaaaa」試圖四両撥千斤，點知轉個頭Edan竟留言：「啲獎金應該淨係夠整你個鼻;(」擺明嘲笑好友，搞到蔡俊彥狙擊：「點夠你靚仔呀，世界仔;((」二人看似互踩，實則已扭轉風向，令網友留言大讚二人夠機智，轉移話題之餘仲識自嘲，態度正面又風趣，成功令二人留言Like數超越原post好幾倍。
另外，又有一則網友惡意評論：「其實唔係edan，邊個會識你？不如專心做番自己該做嘅嘢，唔好發明星夢啦。」今次Edan就全力護航：「公道。條死仔就係唔明呢樣嘢，一啲都唔識得感恩，仲成日要我請食飯。世一好巴閉咩，低質引戰嚟講樓豬都世一蔡俊彥 聽到未？」看似揶揄，實際係同網友表示蔡俊彥於劍擊畀舉足輕重，同時又寸該網友係低質引戰，兄弟情滿瀉。
本文作轉載及備份之用 來源 source: http://hk.on.cc
|
鍾意就快D Share啦！
|
|
|