曼城打少個照贏曼聯。
萬眾矚目嘅英超「曼市打吡」變成執法鬧劇，作客嘅曼城喺大部份時間打少1個下，憑艾寧夏蘭特一箭定江山擊敗曼聯。不過呢個入球就相當離譜，球證同VAR竟然未有「察覺」明顯越位嘅安素費南迪斯影響比賽，判入球成立，官方賽後即發聲明承認球證「判斷錯誤」，令曼聯將帥非常憤怒。
今場打吡氣氛熾熱，23分鐘更辣着火頭，菲爾科頓喺般奴費南迪斯力逼下倒地，般費疑似抽水踢向科頓，科頓即扯火伸腳踢跌般費報復，結果被球證奧利華出示紅牌。踢多個嘅曼聯乘機搶攻，拉舒福特罰球射中柱、明奈之後遠射同樣被門柱所阻，把握唔到機會就埋下輸波伏線。
60分鐘出現關鍵一幕，加華度爾左路傳中，夏蘭特遠柱接應射入，最初旁證舉旗示意夏蘭特越位，但VAR覆核發現曼聯嘅柏德列多古包咗越位。不過重點係明顯處於越位位置嘅安素，門前幾碼試圖插水式頂波，但僅僅頂唔中。根據球例，越位球員就算冇觸球，只要有意圖去影響進攻都應被判越位。
英超賽會喺社交網上即場解說VAR嘅判斷：「VAR判斷夏蘭特冇越位，建議判入球成立。VAR同時判斷安素雖然處於越位，但佢冇掂到個波。」英超呢個解說，已證明VAR只係着眼於安素有冇觸球，而忽略最明顯同基本嘅事實──安素喺門前幾碼去頂波嘅意圖。
負責管理英格蘭球證嘅Pro Ref賽後即發聲明「認錯」：「我哋就夏蘭特嘅入波解說──VAR證實夏蘭特冇越位，而越位嘅安素並冇掂波，所以安素有冇越位犯規，就變成主觀判斷。喺呢個情況下，VAR未有察覺安素對比賽嘅影響，VAR理應建議球證去場邊睇重抽。我哋已經聯繫曼聯，承認今次係錯誤判斷。」
曼聯冤枉輸波，領隊卡域克賽後鬧爆：「我好困惑，依家有幾多鏡頭、幾多人去幫助球證執法？我更加擔心球證點樣去演繹球例，如果安素咁都唔叫影響比賽，我真係理解唔到。睇番重播之後，球證嘅解釋令我更加嬲，簡直難以置信！」
中堅利辛度馬天尼斯亦言辭激烈：「英超係世界最好聯賽，但今場我哋承受住不公義咁返屋企。每季開始前，球證都會向我哋講解1個半鐘頭嘅球例，當時表現得好似好有信心，但之後就會犯呢啲錯誤，完全唔可以接受！」
足球博彩神器，每日重心提供盡在《彩報》：http://win.on.cc/football/
本文作轉載及備份之用 來源 source: http://hk.on.cc
|
鍾意就快D Share啦！
|
|
|