現時娛樂圈面臨着市場寒冬，不少藝人都要放下身段投身其他行業或兼多分職業，最具代表性的算是由歌手轉型為「職安真漢子」的吳浩康(Deep)，之前演員林耀聲（阿聲）亦投身地盤工，原來兩人是賓主關係，阿聲已在Deep的金屬棚架公司任職半年。Deep接受東網訪問時，大讚阿聲是好員工、好幫手，由藝人轉職日曬雨淋的建築工人，依然表現出專業態度，工作超認真令他另眼相看，他說：「其實同阿聲識咗好多年，佢由屋企返地盤工，每程車起碼個幾鐘頭，雖然好多地盤師兄都係要搭長途車，但佢好尊重呢分工，唔止襟捱、襟砌，佢仲肯學同去諗整個流程點做先幫到個團隊。」
Deep最難忘有次阿聲幫他到貨倉取用具時，不慎整傷手指，但翌日如常返工，阿聲的原因是要對工作負責任，令他大感驚訝說：「地盤佬，日薪咋！同我講責任呀？初初合作時，我都知佢好捱得，但原來佢工作好認真，有戲拍就去拍，冇戲拍就返地盤，喺地盤唔係咁理想嘅工作環境下，佢都咁堅毅，好自強不息。」
問到Deep可有介紹幕前工作給阿聲時，他坦言不止阿聲，但凡見朋友工作不穩定都願意出口幫助，他謂：「我唔係專業經理人，連阿聲幾錢一個Job都唔知，不過如果有機會都會問啲客戶冇有嘢啱佢做。」他又說雖然地盤工辛苦，又易曬傷皮膚，但他個人認為當演員也非「風流工」，他說：「拍戲時間長，就算唔使埋位，都要keep住狀態，精神消耗好大，自己就覺得拍戲辛苦過地盤工作。」
另外，Deep雖為「職安真漢子」，但要Chok依然好型，近日他和太太郭思琳帶同愛犬「娜姐」拍攝一輯家庭照，身穿oversize西裝的他，狀態回復當年勇；而已為人母的郭思琳樣貌、身材高企，唯獨老虎狗「幸福肥」了不少。
本文作轉載及備份之用 來源 source: http://hk.on.cc
|
鍾意就快D Share啦！
|
|
|