曼聯連續7場不勝，再爆更衣室危機。(Getty Images)
今季狀態低迷嘅曼聯，周四(22日)凌晨歐聯災難式崩潰，作客「新丁」科木被打到全無還手之力，最終1比4慘敗，近7場賽事未贏過。曼聯隊長般奴費南迪斯賽後爆出驚人言論，公開批評領隊卡域克戰術失當，而卡域克就反指球員「唔肯跑」，更衣室兵變問題更令球迷擔心。
備受壓力嘅卡域克今場變陣，美臣蒙特、馬菲斯迪歷特任正選，面對第1次踢歐聯嘅意甲新貴科木，竟完全被比下去。科木2分鐘即由尼高柏斯妙射領先，呢位阿根廷新星49分鐘妙傳杜域卡斯射成2比0，8分鐘後再藉卡路士巴利巴送禮，射入個人第2球。
曼聯兵敗如山倒，76分鐘被查高普拉蒙頂入輸到4球，去到補時階段先由約舒亞舒克斯破蛋，挽回些少面子。曼聯近7場賽事未贏過(3和4負)，係球會自2015年11月至12月(8場)之後，近11年最長不勝走勢，完場後卡域克亦去到半空嘅作客球迷區道歉。
場上踢到立立亂，場外亦再發生兵變，繼利辛度馬天尼斯上星期炮轟管理層後，隊長般奴費南迪斯今仗賽後亦開火，而且矛頭直指領隊卡域克：「今場唔用人盯人係教練團決定，喺身後留空間再嘗試搶波，但有時你過份讓出球權，對手就會打起信心。」
被問到係咪指卡域克戰術犯錯，般費亦冇否認：「呢個係卡域克同佢團隊要去檢討嘅地方，唔係我嘅事，有時喺壓力下需要更勇敢，冒險去高位逼搶，令對手唔好踢得咁舒服。」卡域克之後不甘示弱，反擊指控球員態度有問題：「唔理用咩體系、踢咩戰術，如果球員唔跑、唔前衝又唔回追，你就贏唔到波！」
足球博彩神器，每日重心提供盡在《彩報》：http://win.on.cc/football/
本文作轉載及備份之用 來源 source: http://hk.on.cc
|
鍾意就快D Share啦！
|
|
|