教識小朋友保護身體
蕭芳芳今次出席活動，是支持護苗基金的全新幼兒教育課程《愛跳舞的小甲蟲》。「我們關心幼稚園性侵，其實是講身體安全，唔係講性。呢個故仔同作者一齊諗，一隻小甲蟲鍾意跳舞，從而學識點樣保護自己身體。可以畀幼稚園小朋友學習，識得身體安全，識得保護自己身體，亦識得尊重別人身體。」
這課程早前在一些幼稚園試行，反應好好，小朋友喜歡個故事，繼而吸收到當中的內容。「就快有3000位幼兒上過呢個課程，最終希望全港幼稚園都會參與。」蕭芳芳說。至於今次邀請到天王郭富城，緣起2004年無綫電視《護苗基金星輝夜》籌款晚會，二人合作跳探戈。蕭芳芳︰「都係因為護苗基金籌款騷，我哋一齊跳隻舞，佢好好人，因為跳呢隻舞要練大半日，佢都肯陪我練，因為靚仔多數都好忙。由於故事主角小甲蟲都鍾意跳舞，所以諗起搵佢，佢一口應承，我好感動。」
耳鳴愈益嚴重 「咁樣出嚟要瞓返幾個星期」
談到芳芳姐的身體狀況，記者讚她狀態好好，她笑指因為化妝，看起來比較好，但耳朵聽力問題則坦言不太理想。「耳仔麻麻地，咁樣出嚟一次，好多聲入咗耳仔自己都唔知，耳鳴情況會更嚴重，咁樣出嚟要瞓返幾個星期，但為護苗就唔緊要。」
因為這個病，芳芳姐不宜外出，從而扼殺了見朋友的時間。「我對唔住啲朋友，出親去見朋友，我又要返去瞓幾個星期，所以我比較少同朋友聚會，自己都覺得有啲唔係好開心，對自己好失望。」提及幾位好姊妹「七公主」，蕭芳芳︰「我有同寶珠聯絡，寶寶在馬來西亞，都有通微信，其他暫時冇聯絡。」
本文作轉載及備份之用 來源 source: http://www.hk01.com
|
鍾意就快D Share啦！
|
|
|