

穿畢業袍拋四方帽留念 親製散水餅答謝台前幕後
林凱恩在紅地氈拍照期間心情大靚,除拋起四方帽外,亦擺出「心心」等可愛甫士拍照。隨後她脫下畢業袍,以一襲綴滿珍珠與閃石的白色斗篷式晚裝配襯水晶頭飾獨家接受《香港01》訪問。談及今晚別出心裁的告別儀式,林凱恩坦言感覺確實猶如正式畢業,並特意準備了「散水餅」答謝一眾共事多年的台前幕後人員:「係呀,如無意外應該最後一次喺呢間公司、同呢間公司一齊過生日啦,咁都好開心嘅,喺度都過咗11個年頭啦。感覺真係似自己畢業囉,即係最開心係識到台前幕後嘅所有人,佢哋都好有愛,所以我特登整咗啲散水餅畀大家,趁住呢個咁開心嘅時間,嚟同大家講聲多謝同埋感恩有大家伴住。」
感恩《愛·回家》遇「Bonnie」 僅考慮三四日決定跳出舒適圈
入行11年來,林凱恩憑藉在處境劇《愛·回家之開心速遞》中飾演「譚育英(Bonnie)」一角成功入屋,深受觀眾喜愛。被問到為何作出離巢決定,林凱恩表示一切皆是命運安排,並感激公司多年來的栽培,讓她發掘到自己的演藝潛能:「呢個決定係命運嚟嘅,我始終都覺得喺呢度學咗好多嘢,同埋試咗好多嘢,都好感恩遇到『Bonnie』或者遇到好多唔同嘅角色,無論係綜藝定係演戲都好,都畀咗一個機會我知道自己有一個表演嘅能力。我都好希望嚟緊無論係用咩形式都好,會繼續可以陪住大家。」
至於這項重大決定究竟醞釀了多久,以及TVB方面有否出手挽留,林凱恩笑言自己僅考慮了三、四日便下定決心,希望趁機跳出舒適,家人亦十分支持她的選擇:「都冇呀諗好耐,應該可能三四日囉。公司有同我傾嘅,但係都係覺得自己努力下先囉,可能喺呢度都一段時間,喺呢個舒適圈太耐,可能試下出去睇下多啲個大啲嘅世界。屋企人只要我開心就得啦,佢哋都覺得喺呢度被保護得太多啦,可以試下都無妨嘅,我自己OK就OK囉。」
親解工作量減少傳聞及合約限制 計劃放假環遊世界
外界向來關注藝人離巢後會否受合約條文限制之後發展,林凱恩對此大方澄清,並形容TVB就像她的家一樣:「好多謝公司,佢又冇限制我點樣,始終我都係覺得公司就好似屋企咁樣啦,佢哋都會希望我發展好嘅,我始終都係喺呢度大。」
被問及是否因為近期工作量減少而萌生外闖念頭,林凱恩坦然表示希望藉此機會多出外旅行、見識世界,探索自己一個人能走多遠。向來熱愛旅遊的她更透露,接下來打算給自己放一個悠長假期,甚至笑言不排除展開「環遊世界」之旅:「都想㗎,咁就可以去多啲旅行,我都好開心亦都好想知道,自己一個人之後可以睇到幾多嘢。(去旅行)會呀!最鍾意去旅行啦我,向來都好鍾意。甚至可能環遊世界㗎!係開心嘅。」
本文作轉載及備份之用 來源 source: http://www.hk01.com
|
鍾意就快D Share啦!
|
|
|


