
無綫一年一度的盛事《萬千星輝賀台慶》今晚隆重舉行,一眾藝人昨日齊集拜神。即將有新劇推出、趕上本年度頒獎禮「尾班車」的羅子溢,極有機會再次與太太楊茜堯攜手角逐視帝及視后。張曦雯則打趣指最想角逐「最佳衣着」獎,直指戰衣的性感程度不受緋聞男友吳卓羲限制。
無綫今晚出動全台約200藝人參與《萬千星輝賀台慶》演出,包括汪明荃領軍並展示驚人記憶力,逐一細數老中青三代幕後同事的名字;相隔23年再次現身台慶夜的視帝羅嘉良與數十位後輩演出歌舞環節,並重現神劇《難兄難弟》的精彩場面;亦有逾80位小生小花參與拍攝的隧道跳唱開場序幕。
汪明荃、黃翠如、麥美恩、羅嘉良、羅子溢、張曦雯(Kelly)、傅嘉莉、龔嘉欣及陳曉華等,昨日雲集電視城拜神。羅子溢與Kelly受訪時透露今晚會參與遊戲環節,後者更有機會夥拍羅嘉良參與舞蹈表演:「我哋拍《模範律師團》嘅時候,佢喺片場都有跳幾下『難兄難弟』搞氣氛。(佢追問記者關於你嘅感情生活喎!)佢做戲叻啫,其實好清楚我,乜都知。(有冇同你講吳卓羲信得過?)又冇乜評語喎!」
鼓勵老婆晒身材
羅子溢主演的新劇《警是個大佬》獲安排於下月推出,相信趕得及參加明年1月初舉行的台慶頒獎禮,成事的話將與主演《玫瑰戰爭》的太太楊茜堯再次攜手角逐視帝、視后寶座。對於楊茜堯被視為視后大熱,他笑說:「咁都唔係啲乜嘢新聞啫,哈哈!反而我叫佢唔好盲撐我,睇咗套劇消化先。坦白講,呢幾年我都好似有機會得獎咁,交畀觀眾啦,我盡咗自己本分就得。」問到Kelly支持子溢還是《璀璨之城》的吳卓羲及張智霖?她笑說:「好難揀喎!不過我有3票,3個都投。(你應該會同楊茜堯拗手瓜?)我想攞『最佳衣着』,有乜理由上年都攞唔到?(今年戰衣會唔會冇咁性感,驚有人唔鍾意?)通常覺得靚就着。(畀佢(吳卓羲)過目?)可以睇吓嘅,但人哋意見左右唔到我決定。」子溢笑說:「我反而鼓勵老婆唔好包咁高,明明有咁好嘅骨架,點解唔畀人睇?唔通遲啲先嚟着咩?」
汪明荃發功寸阿叻
至於汪明荃表示最難忘是多年前曾在多位小生伴舞下跳唱金曲《熱咖啡》掀高潮,感嘆當年有份伴舞的鄭伊健和古天樂,現已有所成就。談到陳百祥(阿叻)早前形容TVB是「市值僅9億嘅細公司」,她表示:「咁全中國嚟講,TVB係其中一間公司,但喺香港就係一間大公司(佢又話TVB經常請唔到大卡士出席活動?)依家年年都有新人加入,我資歷最老。娛樂圈始終要有新人,好似今年司儀麥美恩已經可以獨當一面。(打畀阿叻,叫佢唔好亂講嘢?)呢個係佢講嘢嘅風格,但有冇人信先?」而龔嘉欣透露今晚負責向動作指導等幕後工作人員致敬:「屆時會重溫我拍《功夫》時受傷嘅片段,有留疤,但覺得係做演員嘅里程碑,身旁的陳曉華則自言拍打戲打上癮,打趣指會自動瘦身:「啱啱拍完《驅魔速遞》,我瘦咗十幾磅呀!」
而麥美恩早前盛傳遭雪藏,她大方回應:「多謝公司畀我走出雪櫃,自己有新聞價值,好感恩,多謝大家掛住我,最緊要有工開。其實工作未停過,我明白大家好期待台慶我嘅『黃金畫面』(指台慶攬得獎者谷胸)。」身旁的黃翠如打趣說:「如果有45萬獎金畀我,我會畀心機(谷胸)㗎!」首次挑戰台慶司儀工作的翠如,自言最大「特點」是轉數慢,加上目前有少許感冒,心情難免緊張。提到早前留守馬來西亞拍攝劇集《義和2》,並帶同囝囝「蕭哈哈」同行,她說:「搞到佢心野咗,朝早8點就話去街街。尋日帶佢去咗學校面試,本來都緊張嘅,但見佢現場識唱歌,應該OK啩。」她又大爆老公蕭正楠「投訴」兩母子離港期間,家中突然變得安靜:「個仔返嚟經常跑去攬住佢隻腳,搞到佢好冧,補番晒數」
傅嘉莉狠摑陳自瑤 純粹借位
藝人傅嘉莉(Kelly)昨日現身台慶綵排時遇上前輩羅嘉良,大感雀躍,主動上前介紹自己,原來兩人是首次見面及合體跳舞,她又說:「我仲會同陳敏之、陳煒及姚子羚有一Part表演,一直都知敏之嘅42吋長腿好搶鏡,今次搞到我都望唔停!(你哋嘅舞衣好性感?)我要騷腿同Deep V。(氣溫開始下降?)台慶要凍先有Feel!」談到在《玫瑰戰爭》與陳自瑤上演一場「戲中戲」,不停狠摑對方,更掀起戲外暗戰疑雲,Kelly解釋:「其實係演戲,真係演嘅,冇理由打傷對方,如果咁樣我隻手都會甩骹好多嘢都係鏡頭就位,我有掂住佢塊面推,事前同佢又有好多溝通,第一步係試打佢隻手,畀佢感覺力度,同埋我冇戴任何首飾同剪短晒指甲,確保冇問題。(用力嘅話拍咗幾次?)近鏡用力推一定少過5次,我寧願打錯都唔想打傷對方,因為當年我拍《包青天》同武師對打,佢計錯時間打咗落我眼眶同氣門。(覺得咁樣畀人鬧好無辜?)劇情需要,我乜都肯做,但演戲真係演,之後劇情會講我畀人打針,唔通真係打落嚟咩?」
陳若思心大心細 郭珮文翻撻舊愛?
參加戀綜《女神配對計劃2》的陳若思和郭珮文昨日現身台慶拜神儀式,透露有份參與台慶開幕式歌舞表演,稱舞技尚算可以。提到節目中的求愛勇者Oswald傳與練樂儀拍拖,陳若思指看到Oswald在社交網發文解釋,而且對方曾分享相約大班朋友齊齊睇節目的照片,相信他是單身,今次只是一場誤會。至於郭珮文則反應較大,聽到Oswald的緋聞不禁「吓」了一聲,認為參加者若非單身不太好,但相信Oswald不敢自製黑材料。她們透露節目尚未拍完,問到能否成功出Pool?陳若思坦言覺得Alan和子朗都很好,仍在猶豫不決:「我今日想揀,聽日又唔想揀,自己都唔知想點。我唔係善變,係諗好多嘢,決定揀一個之後,大家焦點就放喺我哋身上,會好大壓力,要諗好清楚。」郭珮文撐她這是負責任的行為,至於問到她能否與舊愛Ice復合?她笑說:「大家留意節目我係知道點揀。(你會出Pool?)應該會,我會揀到。」
本文作轉載及備份之用 來源 source: http://hk.on.cc
|
鍾意就快D Share啦!
|
|
|



