
普捷天奴肩負復興曼聯重任。(Getty Images)
萬眾期待!曼聯今年第3位領隊普捷天奴正式亮相,呢位阿根廷教頭周三(18日)由美國飛抵英國,落機就直奔卡寧頓訓練基地開工。精神煥發嘅「肥普」向球迷承諾,今季將會係「特別球季」,更霸氣反擊曼城球迷挑機,豪言曼聯將會重新統治曼徹斯特。
普捷天奴周三朝早帶領美國擊敗海地後,立即坐私人飛機趕赴曼徹斯特,到埗後隨即投入工作,首度舉起曼聯波衫公開亮相。54歲嘅普捷天奴表示:「各位曼聯球迷,好期待同你哋見面,我會將快樂帶畀你哋,今季會係好特別嘅球季,球員會喺場上戰鬥,拎番我哋應得嘅成績。」
「肥普」未正式領軍就先贏民心,喺佢出發飛英國前,曾效力過曼城嘅前美國國腳比亞士利,公然向普捷天奴挑機:「我之前講過,曼徹斯特係藍色(曼城),永遠都會係藍色。」普捷天奴隨即擰頭,霸氣反擊:「冇可能!睇下點。畀啲時間我,呢個情況將會扭轉!」
曼聯自費格遜喺2013年退休後,對上13季英超排名都低過同市死敵曼城,「紅魔鬼」依家排喺第18位,已落後第3位嘅曼城13分。普捷天奴將喺周一(23日)凌晨首度領軍,作客晏菲路大戰利物浦,佢早前已派出助教捷西斯佩雷斯提早飛曼徹斯特安頓,把握時間備戰。
足球博彩神器,每日重心提供盡在《彩報》:http://win.on.cc/football/
本文作轉載及備份之用 來源 source: http://hk.on.cc
|
鍾意就快D Share啦!
|
|
|



