

報道刊出前7小時獲通知 否認以私密片段炒作博上位
馬賽回想出事一刻仍記憶猶新:「嗰時出事嘅時候我係好shocked,我記得好清楚,我喺幾個鐘之前知,因為我契媽有識一啲傳媒朋友,收到傳媒朋友話唔好意思,我哋聽日六點幾鐘要出雜誌,前一晚11點左右,我知道七個鐘之後會發生呢件事。人哋話『唔好意思,呢個係上面話必須要出』,真係好似講返故事咁,好似好dramatic,我哋幾個鐘之後要出馬小姐呢篇報道,對唔住,上面一定要出,單聲,叫你有準備。」
伍詠薇追問當時如何處理,馬賽強調自己當時發展平穩,甚至被指「出道即巔峰」,不可能流出這些照片搏炒作去毀掉自己事業:「當時所有風波,嗰條片,我知邊個人有嘅,梗係唔係話我send俾報紙所有人,要報紙寫我,嗰個係好私隱嘅片段。」伍詠薇亦直言:「成熟嘅人諗,得你同我,兩個人,點會出到街呢?」暗指是對方流出。
自責連累家人公司默默落淚 主動開記招以為事件會告一段落
得悉報道勢必出街後,馬賽已「心中有數」,知道事件必定會「爆煲」:「冇嘢講,我比較難受嘅係唔知點樣面對對屋企人,面對公司,因為呢啲係好private嘅嘢,我冇可能同屋企人或者公司講曾經有件咁嘅事,但係我知道,死喇,我好對唔住佢哋嘅栽培,呢個係我第一個反應,我會影響好多人。首先我影響咗我公司,我個copyright喺公司,第二我會影響咗屋企人,咁private嘅嘢,所以其實當時我層樓住咗個鄰居係律師,我就有諗係咪搵法律上嘅處理定係點?我好冷靜,其實我有冇喊,當晚嗰時我冇歇斯底里嗰種喊,我默默流淚,當日開始我就食唔到飯。」
當時馬賽在香港只與工人姐姐及一隻愛犬同住,家人長居外地,她坦言根本無勇氣提前向父母交代這件事,冷靜思量後,她向公司提出開記者會。如今回望,她直言:「其實我講嘅每一句說話都係我真心想講,公司唔係好識點樣處理,好多記者去問曾醒明先生、樂小姐攞馬賽嘅feedback,我電話爆炸咗,好多message我都唔敢睇,其實我係唔識處理,如果我可以多啲智慧去處理呢件事情,可能我會處理得更加好。但係當時就係要面、要贏,所以我要企出嚟開記者會,公司話你真係要開記者會?我話我想有一個了結,講出嚟,我冇呢條片,我冇乜乜乜,我冇乜乜乜,講完,結束咗。」
閉關閂窗簾避狗仔隊 陷自我懷疑最感謝胡杏兒力撐
記者會過後,馬賽足足一星期不敢踏出家門半步,全日拉實窗簾避開樓下五、六架狗仔隊採訪車;雖然那段時間每日都有圈中同行上門探望,但大家亦愛莫能助。被伍詠薇問到當時有否見盡人情冷暖、或是昔日好友「雞飛狗走」,馬賽指自己向來目標明確,入行只一心想做好份工,平日極少與圈內人埋堆玩樂,因此出事時本來就沒有太多深交的娛樂圈朋友。她透露2013年經歷緋聞報道後,2014年事發前已開始看心理醫生及寫感恩日記,為了撐過這段黑暗日子,她便寫日記自我療癒:「我mark低邊啲人我要感謝,其實都訓練緊自己唔好Focus喺負面嘅嘢,有兩個月雜誌基本上全部都係我,負面嘅,各種各樣都係我,我有時睇啲有時唔睇啲,令到我嗰段時間有一個精神上嘅壓力同埋幻覺,其實我唔知我究竟係邊個。我係咪真係咁樣呢?點解佢要咁寫我呢?究竟呢個係咪我呢?」期間有朋友離去亦有朋友變得更親近,而這場「事故」最終演變成她人生的「故事」。
馬賽點名感謝胡杏兒:「杏兒真係有喺微博上面撐我,公眾平台撐我,我記得當時嘅雜誌有80%都係Negative,可能20%都會有啲人支持,但係好細聲,好多公司睇住我出道嘅高層、監製,佢哋都好撐我,了解我嘅性格。」
人生最低谷突獲許鞍華邀試鏡 得悉與吳鎮宇合作喊住答應
在躲在家中避世的的最低谷時刻,馬賽人生突然迎來一線曙光:「就係我經理人打俾我,佢話『賽賽,頭先許鞍華導演,有個短片想搵你拍,你有冇興趣呀?』」馬賽2014年開始學佛,每當鑽牛角尖時便播放《心經》,她深信有一股力量與自己同在,才會出現這個機會:「佢話阿Ann想搵你拍戲,你介唔介意,有冇心情去做casting ?男主角係吳鎮宇,我話『嘩!OK啦 OK啦。』一路喊住話OK,好似拍戲咁樣。」
終獲選中演出重見陽光 英國避世回港搭的士發生尷尬一幕
答應試鏡後,馬賽激動得開心大哭了10分鐘,但隨即提醒自己不能再哭,因為當時已有一段時間吃不下嚥,再哭下去身體會垮掉。由於試鏡定在一星期後,依然不敢拉開窗簾的她,每天強迫自己吃東西撐下去。一星期後,她終於在文化中心一間咖啡店見到許鞍華,自己緊張而不敢作聲,並形容如果這是一套屬於「馬賽」人生的電影,這一幕劇本想必是講到主角很久沒見到陽光:「佢坐喺度,背景好似出現咗耶穌光咁,因為陽光曬到灣仔個海面,我會覺得原來呢個世界仲有光嘅。但係佢casting好多人,佢就話有機會再通知你,我嗰時就決定我離開,我就去咗英國,同公司話我請假。」
她坦言去英國一個月所謂「遊學」進修舞台劇,其實心態上只是想逃走、靜一靜及不想見人,直言若人生如戲,自己角色當時只求活著:「我呢個角色得一個目的,就係生存落嚟,活着,拍好許鞍華。」人在英國期間,她於10月3日突然收到通知獲選中演出,為配合吳鎮宇檔期隨即訂機票返港,開工首日更發生極具戲劇性的一幕:「我記得拍戲第一日,我搭的士,廣播電台就係,『今日新聞到呢度』之後有個速報『純純兔馬賽返嚟』我坐喺後面好尷尬,你明唔明?我坐的士去開工,佢個Radio,話馬賽返咗嚟香港。」
因許鞍華邀請重拾自我價值 馬賽永世感謝:否則好難撐落去
她坦言當時覺得人生完全不受控制,彷彿成了任人書寫的故事主角,直至拍完該片,才重拾少許自信,自己終生都感謝許鞍華導演:「其實好感恩,阿Ann我依家仲有聯絡,我不停喺呢十幾年都有同佢講感謝感謝,佢話『你唔好感謝我,我只不過覺得你個樣好似60年代嗰個人嘅樣,比較老師,有書生嘅味道,係咁樣啫。』但係其實我覺得只不過係一個善良嘅人佢嘅說辭,其實佢真係幫咗我。我話我一定係永世感謝你,如果冇咗呢一個目標同埋理念,覺得自己仲有少少價值,係真係好難撐落去。」她表示當時矇查查入TVB、選港姐,所有際遇都推她上高位嘅時候,但同時令她覺得「我所有價值就係我戲好唔好睇、觀眾鍾唔鍾意我、媒體點樣寫我。」直至不愉快事情發生,媒體態度180度轉變,她不禁反思究竟自己還剩什麼價值,結果發現原來只有深刻的自我懷疑:「佢將你覺得你執着嘅名利、金錢、朋友、人哋嘅睇法全部攞走晒,咁我仲剩返乜嘢?我由阿Ann呢個電影,搵返咗我仲有少少價值喺度,拍完呢個之後,珍姐嗰邊又開咗套《東坡家事》,係黃偉聲導演。」
伍詠薇安慰沒有做錯 馬賽反認任性:我冇話AI合成,係我我就認!
伍詠薇安慰馬賽,指其實她沒有做錯任何事,馬賽卻回答:「但係其實係我唔識得處理,我有冇任性?有冇唔聽大家嘅說話去做一啲嘢?我覺得我有,入世未深,我哋叫吃虧啦,你係要吃嘅,吃咗就認,我覺得係要認,認咗之後我覺得任何所有嘢你都要接受,係我嚟嘅,我又冇話係AI合成,係我我就認!」
杜琪峯電影戲份遭刪誣衊戲屎 感嘆跌入谷底「一沉百踩」
拍畢台慶劇《東坡家事》後,杜琪峯監製的電影《七人樂隊》及《三人行》(趙薇、古天樂、鍾漢良主演)曾透過朱淑儀(Elaine)找無綫藝人客串,馬賽亦欣然答應參與。不過由於當時劇本邊拍邊寫,待她從內地工作返港後,才獲告知其後續戲份已被刪減。這件事卻令她再次體驗到娛樂圈的殘酷:「我記得好清楚,雜誌好大本就寫我話我戲好屎,俾人cut咗,所以你頭先問我邊啲朋友好、邊啲朋友唔好,其實我心中有數,不過唔好嘅人我唔會再俾佢留喺我生活當中。當時有句說話叫一沉百踩。譬如我拍到阿Ann呢套戲,就話我唔知用啲乜嘢計謀去氹阿Ann嘅Assistant,杜sir嘅戲又話我戲好差俾人踢出劇組,後尾就覺得我企喺條街度都係錯。」
青海支教成人生轉捩點:所有自我執著都係Bull shxt
其實當時無綫依然給予她不少機會,娛樂新聞台監製更安排她擔任直播主持,令她感受到身邊仍有許多人愛錫自己。然而完成節目後,她主動向公司提出請假:「我今年嘅show做完,不如真係俾我靜一靜,因為我出親嚟都係累人,拍一套阿Ann嘅戲,又話我要出古惑,拍杜sir嘅戲又話我乜嘢,任何人嘅新聞,我黐埋去都係唔好,我企喺度好似將成個event變咗緋聞、是非,我話不如我嘅show做完我請假,就去咗支教,去咗青海,嗰個經歷改變我好大,之後我就冇再食精神科藥物。」青海的純樸生活徹底治癒了她的心靈內耗,她領悟到:「之前所有所有嘅執着、諗唔開,都係自我嘅執着,係bull shxt!因為我生存其實冇發生任何問題,只係我個腦不停諗,『馬賽係點樣、香港小姐係點樣、我建立咗咁耐嘅觀眾點解唔再鍾意我,我究竟係點樣?』其實係bull shxt、係幻覺,你喺嗰度生存,每日最簡單,其實人生除咗食得好瞓得好,有得痾之外,心情好,其他嘢都係bull shxt。」直至2015年公司與她洽談續約時,馬賽自覺心靈已無法再應付這個複雜的環境,最終毅然一走了之,留下一句:「對唔住,我要靠自己,我要生存先!」之後全力在北京重新開始。
本文作轉載及備份之用 來源 source: http://www.hk01.com
|
鍾意就快D Share啦!
|
|
|


