藝人張智霖晚上（6日）現身澳門，與一班台慶劇《璀璨之城》台前幕後人員齊齊收看大結局。對於劇集來到最後一集，張智霖坦言「眨吓眼」就到，很感恩能參演此劇，提到大家大讚他劇中演奸角出色，他表示演員應該要給面觀眾有不同面向，他説：「希望大家都會認同我係一個演員嘅身份！（琴晚2分幾鐘獨腳戲網民話係神級演技，力撐你攞視帝！）多謝喎！我好似都做過幾次頒獎嘉賓，咁我係咪…算唔算係升呢？（係時候上台攞？）冇諗呢啲嘢，我到依家呢個年齡段，都係想盡量自己有能力嘅時候做好角色，即係唔係再為自己往後去鋪排想點樣，觀眾睇得開心已經係我最大嘅收成！無論有冇提名，有份參與就高興！」他指能否出席頒獎禮要視乎會否跟演唱會撞期，直言很希望劇集能成為2026年最佳劇集：「因為大家都花咗好多心機去突破自己，我祝福《璀璨之城》會係最佳劇集。」
談到網民指劇中只得他沒有除衫騷肌，張智霖笑言以往已演過不少，加上今次劇情沒需要，問到會否想拍第二輯？他叫大家先看完大結局。對於張曦雯的性感戲被大幅刪剪，他坦言當中確實做出了適當的刪剪：「監製都有講，話TVB好尊重觀眾嘅意見，我覺得係啱嘅，觀眾如果覺得係太刺激，OK！冇咁刺激囉！」對於他之前在訪問中笑指張曦雯因「唔輸得」而應承拍半裸戲，事後被網民批評輕佻，他說：「好彩你都知我係講笑，其實真係講笑，如果大家唔係好鍾意開玩笑，咁就認真啲、嚴肅啲去回答問題。即係我都要不停上課，我都要多謝大家指點。」
提到有指劇集應有25集，張智霖表示由始至終也是20集：「本來個劇本仲激，所以要停拍再寫，並唔係因為任何演員。」對於今次轉型演奸角成功，他自爆希望可挑戰當導演：「畢竟自己有30多年嘅經驗，好想拍關於AI影片嘅故事，我諗到一個好有趣嘅古仔，依家大家好鍾意睇AI劇，我想演AI劇，即係我做返好似AI嗰種唔合理、啲門突然間嗰邊開、突然間又唔連戲，其實好多時係啲Bug，我就係想演個Bug出嚟就好好笑。」
另談到他早前於佛山開騷時與舊愛許秋怡合體唱出經典作《片片楓葉情》，太太袁詠儀（靚靚）更在台下拿手機替他們拍照，張智霖表示是跟太太一起邀請對方到來：「佛山係我嘅籍貫，嗰度尤其係鍾意廣東歌，《片片楓葉情》係要唱一次嘅，佢1月份會有個演唱會，我到時都會去，當係互相支持。」他表示2027年會繼續到不同地方做巡唱，也希望能在香港舉行，笑言啟德場地太大，自己的目標是紅館。
同場的陳瀅，對於好友JW（王灝兒）終於正式承認婚訊，陳瀅表示：「恭喜晒佢，戥佢開心！（參加婚禮有冇搶到花球？）隔咗咁耐唔記得啦，哈哈！但應該係冇嘅，因為自己冇呢個記憶，唯一記得係個結婚蛋糕好大個！（JW話辛苦朋友為佢守秘密一年。）佢想幾時公布係佢嘅自由，我哋都Respect佢想幾時同大家去宣布，但係作為好朋友，當然戥佢開心，搵到一個咁好嘅老公。」問到對方婚後有否派利是給她？她笑言忘記了，又指對方有嘗試於婚禮上為她介紹男生，但可惜席間大多男生也已婚。談到朱敏瀚與周嘉洛投訴自己沒份去旅行，陳瀅説：「要幫JW澄清返，唔係冇邀請，係佢兩個拍緊劇，所以去唔到。」
本文作轉載及備份之用 來源 source: http://hk.on.cc
|
鍾意就快D Share啦！
|
|
|
