2013年12月6日 星期五

[忽然1周 958] 率先爆得獎名單 寧推 50萬騷  Cool魔擸視帝 Cool魔,張智霖,MW,




向來與無綫關係良好的張智霖,雖然唔係親生仔,但觀眾一致讚好,無綫有見及此,九成九都會頒獎俾佢。

滾熱辣

率先爆得獎名單 寧推 50萬騷  Cool魔擸視帝

台慶頒獎禮,還有不足兩星期( 16日)舉行。視帝視後年年爭崩頭,日前本刊收到消息,無綫在上周三(上月 27日)公布提名名單前,所有高層包括非戲劇製作總監餘詠珊及製作資源總監樂易玲等人,曾進行長達三小時閉門會議,開會期間高層更露口風講出獎項的心水人選。

馬國明早前為搏攞視帝,私下與無綫加簽七年約,可是,由於經歷熄電視風波,令無綫台慶收視插水。為免再次辣㷫網民,無綫在今次頒獎禮選擇順應民意,將視帝寶座授予非親生仔張智霖。據知,得知有望開齋攞視帝的 ChiLam,索性推了湖南衞視五十萬人仔酬勞節目,疊埋心水等拎獎。

其他影片

今年中播出的《衝上雲霄 II》,有外將吳鎮宇和 ChiLam壓陣,收視口碑全年稱冠。在劇集中飾演 Cool魔的 ChiLam,有望憑此劇稱視帝,因此早前已揚言會度定期出席台慶頒獎禮。

大馬奪視帝

張智霖上星期憑 Cool魔一角奪「大馬最受歡迎男主角」。心雄的他,希望再下一城在無綫頒獎禮奪視帝寶座。

靚靚 mark實

得 Cool魔一角帶挈,周日( 1日) Chi Lam去完大馬攞獎,即到湖南搵真銀,老婆袁詠儀亦有同行。二人在當地逗留兩天,周二下午搭飛機返港。

出動傾獎

ChiLam和老婆落機返家後,到晚上再返公司,與經理人蕭定一傾了約兩小時,才與靚靚攞著兩大箱客戶送的禮物離開。

馬明成犧牲品

無綫去年視帝視後皆為全民投票,今年忽然改賽制,視帝視後改為一半民選,一半專業評審選出,變相令無綫到最後一刻仍可操生殺大權。早前已續約無綫七年的馬明,原本視帝夢早已入直路,但現在卻生變卦。知情人透露:「公司早排走咗咁多人,班高層見馬明聽教聽話,所以先將《 On Call II》提前擺喺台慶檔推出。不過早排電視牌照同熄電視風波,無綫驚收視好似台慶嗰晚咁創十年新低,所以有意將視帝個獎頒俾非親生仔 ChiLam。一嚟 Cool魔角色夠搶,二嚟網友又 buy佢。」

今年為爭視帝,剛與無綫續了七年約的馬明,早前曾對記者表示有信心攞獎。可是其主演的《 On Call II》,收視口碑均麻麻,令原本實食冇黐牙的視帝寶座,極有可能拱手讓俾 Cool魔張智霖。

台慶先勝一仗

上月中台慶夜,在圈中人緣甚好的馬明,先拔頭籌奪得「藝員眼中的視帝」。據知,高層樂易玲和曾勵珍,由於不想肥肉落在外人手上,現階段仍落力遊說其他監製,希望造就馬明奪獎。

蕭定一:睇無綫點做

知情人士說:「 ChiLam覺得去得頒獎禮一定要攞最大嘅獎,冇視帝唔會到,就算俾個豬肉『最受歡迎電視男角色』獎都寧願唔要。佢哋話如果去到宣布嗰一刻先知唔係自己,個鏡頭影住自己大頭,都唔知俾個乜嘢表情。其實佢自己都知攞咗視帝,身價會唔同,返大陸做嘢隨時多三、四倍酬勞,冇人會嫌錢腥嘅!」

記者周一( 2日)就 ChiLam推內地騷致電其經理人蕭定一,他直認:「嗰晚的確有個賺好多錢嘅 job搵佢做,但 Cool魔呢個角色係無綫帶俾佢,令佢今年成績好好,應該報答番無綫。不過咁大嚿錢嘅 job唔接,對 ChiLam同公司都係好大損失。(係咪攞視帝先到?)個 job就推咗啦,不過佢都仲有其他嘢做,盡量就啦!都要睇無綫點做㗎!」意味 ChiLam獎到人到。無綫今年為自保,睇嚟與無綫續了七年約的馬明隨時得個吉。

至於 ChiLam亦和經理人同一口徑:「到唔到要睇公司安排,不過人哋攞都戥人開心嘅!」

視帝自選

今年視帝前 15名入圍男星已公布,在他們心目中各有不同意見及得獎人選。日前記者訪問眾人,大部分對自己都打定輸數,索性買定花生等睇 ChiLam同馬明鬥。

祥仔打輸數

今年真係難揀,《衝 II》口碑真係好,兩個男主角咁受歡迎,超班演出,好有魅力,自己冇期望。

鎮宇冇信心

祝 ChiLam旗開得勝啦,我自己就信心唔大啦。但無論如何, TVB係我『母校』,下年我都會返去拍劇!

子華冇得爭

爭視帝?唔使啦,今年唔係張智霖就係吳鎮宇,其他冇得爭。

陳豪生仔緊要

今年唔會係我喇,現階段嚟講,生 BB最緊要。

正楠認冇機

我只係等個飛躍獎,四年都冇呀,要攞視帝冇十年八年唔使講啦,一定唔會係我呀!

馬明分分鐘雙失

綜觀多個討論區,發現網友心目中的視帝離不開 ChiLam和陳展鵬之爭。馬明除了輸視帝,分分鐘連「我最喜愛男角色」亦要拱手相讓俾其他人。

嘉欣攞獎公開戀情

一招有獎先到, ChiLam冇得輸。至於視後方面,去年已是民選視後的鍾嘉欣一枝獨秀,除了《巨輪》飾倀雞英的田蕊妮有少少威脅外,幾乎冇人同佢爭。早前在大馬頒獎禮先奪視後的她,雖然在《巨輪》中不及田蕊妮出位,但年中她在《玩嘢王》節目做嘉賓,其哭崩長城玩番魔術師轉頭一幕,備受激賞。日前曾勵珍更向本刊透露,今年會捧她做視後。

「我今年睇好佢(鍾嘉欣),我都有讚佢喺《巨輪》演技唔再誇張,好定好沉實表達內心戲,係好大進步。(你會投佢一票嗎?)會,一定會!」有珍姐做後盾,嘉欣 BB封後冇走雞。

同時,本刊亦收到風,為加強娛樂性,鍾嘉欣在頒獎禮當晚,將會效法胡杏兒,得獎後正式確認拍拖六年的男友伍允龍身份。知情人透露:「嘉欣同 Philip(伍允龍)拍拖一直好低調,搞到好多人以為佢哋散咗,早排仲傳佢同陳展鵬撻著。佢兩個為咗呢件事搞到有啲唔開心。所以嘉欣同咗公司提議,如果自己有機會上台攞視後,就會公開戀情,佢咁做一嚟可以杜絕緋聞,二嚟觀眾又會覺得佢夠長情,對形象都有幫助。」

等足十年

早已是「民選視後」的鍾嘉欣,等足十年,今年終於唔使陪坐。

公開六年情

鍾嘉欣與伍允龍地下戀維持了六年,每次提到男友她也甜絲絲。據知雖然二人在圈中男卑女尊,但至今感情依然穩定。

效法胡杏兒

兩年前,胡杏兒得視後時公告與黃宗澤「好難頂」戀情,場面感人,可惜二人數月後分手。據知今年鍾嘉欣有意效法胡,上台攞獎時會正式確認伍允龍男友身份,以杜絕其他緋聞。

唔敢爭

田蕊妮憑《巨輪》倀雞英一角贏盡民意,不過她對獎項睇得好化:「呢個角色本身討好啫,多謝珍姐(曾勵珍)俾機會。攞視後我唔敢諗啦,可以提名同觀眾認同已經好開心。」

同事最愛

田蕊妮在台慶當晚先拔頭籌,擊敗鍾嘉欣獲全台藝員投票成「視後」,她說:「我講過唔喊,但真係好感動。」喊到收唔到聲。

《巨輪》不是台慶劇,但也極受歡迎,個勢仲好過《 On Call II》及《法外風雲》。

新賽制

新人事新作風,近兩年無綫無論頒獎或選美,賽制不斷變,今年台慶又改制,分三個不同界別俾獎,觀眾要投票真係要睇清楚,事關眾多獎項中,就只得「最受歡迎電視男、女角色」是真正表達民意的全民投票,其餘各獎項加入「專業評審」和「全台投票」,言下之意,始終係自己人玩曬!

吳卓羲壓蕭正楠

至於由全台職藝員加專業評審選出的「男女配角獎」以及「男女飛躍進步藝員獎」,雖然係細獎項,同樣成為上位的姐仔小生爭奪目標。

據知,最佳男配角原定由曾勵珍愛將蕭正楠奪得,但吳卓羲明年中便約滿無綫,近年已冇擔正做男主角的他,完約後本來的起心肝返內地拍劇,近日卻多次被無綫挽留,更以獎項利誘。知情人士透露:「阿 Ron(吳卓羲)喺《衝上 II》角色討好,俾佢攞都叫合情合理。燉咗落二線咁多年,近排拍緊嘅《醋娘子》,阿 Ron都擔正做番一線,睇得出公司係想留佢!」至於被吳卓羲攝了男配角獎的蕭正楠,據知最終只會奪得「飛躍進步男藝員」。

以獎留人

吳卓羲近年在無綫被投閒置散,連男一都冇得做,早已決定明年離巢,但無綫近年唔少一線藝人唔續約,因此用「最佳男配角」獎來換取他留低,出盡法寶留人。

主角變配角

吳卓羲在《衝上 II》表現討好。劇中本與胡杏兒是一對的他,提名男配角,相反胡杏兒卻憑劇中角色提名女主角。不過有獎攞,相信吳卓羲都唔會介意嘅!

犧牲蕭正楠

男配角獎既然預留俾吳卓羲,本屬大熱的蕭正楠便要犧牲,只能「燉」落「飛躍進步男藝員」獎。不過,從未在台慶頒獎禮攞獎的他,好過冇啦!

翠如惡鬥香香爭「飛躍」

除了視帝、視後主要獎項外,今年的「飛躍進步女藝員」同樣爭持激烈,縱觀有份入圍的名單中,以宅男女神岑麗香勝算最高。

不過據知由非戲劇製作總監餘詠珊一手捧紅的黃翠如對此獎亦虎視眈眈。一無綫工作人員透露:「 Sandy(餘詠珊)唔衰得㗎嘛,佢用咁多心機穀翠如,梗係想佢攞啦,擺明自己有眼光嘛!呢排佢成日約監製、幕後食飯,講明幫翠如 BB拉票。不過因為投暗票冇人驚佢,所以好多人表面應承,實則唔會囉!唔係翠如唔好,係唔想益咗 Sandy啫!」

硬插愛將

餘詠珊硬插愛將黃翠如爭「飛躍獎」,不過其他高層及無綫職員卻屬意香香攞,相信餘個如意算盤打唔響。

香香夠搏

岑麗香在《神鎗狙擊》做女飛虎,緊身 T恤「戥戥下」跑步夠曬搏,得高層歡心亦得網民喜愛。

江美儀開齋

江美儀並非無綫親生女,但多年來在不少劇集也有突出表現,連續三年成「女配角」大熱。今年她與馬國明在《衝 II》有多場親熱戲,掀起熱話,據知無綫今年有意讓她奪「女配角」開齋。

《忽周》民選視帝視後

無綫今年改賽制,唔玩全民投票,變相重回小圈子選舉舊路,觀眾有得揀變成無得揀。《忽周》今年和往年一樣,為讀者舉辦一人一票視帝視後選舉,參加讀者除了可以揀選心水視帝視後,更有機會得到名貴獎品。詳情請翻閱 p.50。

其他影片


鍾意就快D Share啦!
Related Posts Plugin for WordPress, Blogger...