2013年12月6日 星期五

[忽然1周 958] 停飛暫借問 宮崎駿 宮崎駿,MW,




喺主角二郎嘅童年夢境中,經常出現意大利飛機工程師卡普羅尼,佢哋從未真正相遇,但呢位偶像,激發咗二郎嘅飛行夢。

歐洋風

停飛暫借問 宮崎駿

睇宮崎駿嘅動畫,有啲似朝聖。

每隔幾年,收到消息,大家自動自覺買飛入場。唔使 3D嘅!只要睇住靚爆手繪畫面,聽大師訓勉就滿足。不過呢位 72歲嘅殿堂級動畫大師特有性格(仲好識做生意!),得閒就會嗌 stop,今年係 27年間第 5次宣布退休嘞。

不過唔緊要嘅,點都睇咗佢嘅新作《風起了》( 12月 19日上映)先,反正我哋對有料之人特別尊敬同包容,就如當年哥哥、梅姐封咪後再唱,完全 no problem喎,係啲明明有顆狼心,又冇料嘅人係都唔落台,先最令人無語問蒼天囉……

從《風之穀》、《天空之城》到今年嘅《風起了》,可以見到宮崎駿對飛天特別著迷。可能因為佢爸爸喺家族經營嘅「宮崎航空興學」做嘢,令大師自小愛飛機。今年 9月喺記招上,一講起飛機,佢就非常 happy!

二郎原本想做飛行員,但因為近視而轉向製造飛機。而二郎其實真有其人(小圖), 1903年出生,因開發零式艦上戰鬥機而聞名,後於東京大學宇宙航空研究所、防衞大學任教。

反戰不反戰?

作為大師告別作(暫定啦!)改編自同名小說嘅《風起了》,以宮崎駿最鍾意嘅日本大正至昭和前期為背景,當時未有大量工業汙染,藍天白雲,青山綠水。故事講述年青飛機工程師堀越二郎以「製造美麗飛機」為夢想,不斷努力。女主角菜穗子就係每個成功男人背後必備嘅捱得小女人,仲因為照顧阿媽捱到有肺結核,但仍然死頂支持老公追夢,聽落都覺得淒美。不過有文化評論話宮崎駿呢套戲唔似以前咁綠色同反戰,仲流露出對軍事技術嘅迷戀。 Well,大師就咁話:「戰爭有好多悲慘嘅事,但零式戰機令日本國民覺得日本軍都有厲害一面,所以喺大家心中一直無被磨滅。而我個人當然係反戰,呢個立場好清楚!」

愛畫畫嘅女主角菜穗子同二郎喺關東大地震時相識定情,十年後重逢兼訂婚,後不幸患肺結核。唔講唔知,原來宮崎駿媽媽都患過肺結核,經常入院,難怪大師作品入面嘅媽媽唔係有病,就係唔喺主角身邊。

電影一開始,就講 1923年嘅日本關東大地震,短短幾分鐘嘅走難畫面,就有 50幾個層次、唔同人物走避嘅動作,製作團隊花咗成一年半嘅時間去完成。

大師話二郎原本唔係想造戰機,而係造飛機。但當時只可設計戰機,佢無選擇,有時夢想都係一個詛咒,唉!

男主角好勤奮,先考入東京帝國大學工學部,畢業後入咗三菱公司,後尾去埋德國進修,但卻鬱鬱不得志,好在老婆菜穗子不斷鼓勵先開始發圍。都話背後女人好重要!

退休不退休?

好嘞!表明咗心跡,咁退休呢個問題又點呢?

唔驚,唔驚,宮崎駿話唔再做長片啫,但就畫緊漫畫《戰國魔城》,仲特登俾日本 NHK電視台影佢為畫稿上色,然後由佢老友兼吉蔔力製作室負責人鈴木敏夫放風,話大師可能會連載漫畫,「依家佢畫緊戰國時代劇,但我講太多會俾人鬧,所以講住咁多先啦!」查實 81年嗰陣,宮崎駿諗住將《戰國魔城》呢個意念拍動畫,可惜投資者反對,話無原作題材拍出嚟嘅動畫會唔好睇。大師唔忿氣,就將《戰》嘅某啲元素畫成漫畫,喺雜誌連載,後尾卒之拍成《風之穀》㖭!所以話呢,以宮崎駿咁不屈不撓不停步嘅性格,應該好快又有好嘢俾大家睇。風,會繼續吹嘅!

老而彌堅

從日本電視台節目,見大師雖然一把年紀,但為漫畫上色依然乾淨利落,堅!



鍾意就快D Share啦!
Related Posts Plugin for WordPress, Blogger...