掃呢頁CODE去手機

2014年2月5日 星期三

[FACE 350] 半年前搬返外家  Toby擒完吳卓羲離婚 吳卓羲,MF,




最新圖片

年初四下午, Toby同家人食完午飯出嚟,大方回應離婚問題,不過見 Toby眼腫腫,應該仲未放得低。

封面

半年前搬返外家  Toby擒完吳卓羲離婚

30歲貪玩人妻梁靖琪( Toby) 11年底結婚, 12年 9月飛海南島拍《衝上雲霄 II》同吳卓羲泳池肉搏摷攬,有傳 Toby老爺嬲到上門發火扔雜誌。

雖然 35歲黃敏豪( Aaron)事後亦曾力撐老婆,但原來於半年前、即泳池嬉春後 10個月,黃向 Toby提出離婚,短婚年半,兩人協定暫時不公開。

不過,紙包唔住火,本週一年初四,已搬返娘家的 Toby與家人出外下午茶,本刊上前求證離婚消息,父親梁家樹先代女承認婚變半年,經過梁家在餐廳開會近一小時, Toby終於出來剖白︰「係和平分手,已經一段時間。(緋聞搞到離婚?)唔關事。(計贍養費?)咩都唔要!」

其他影片
  • 父母齊護女  Toby媽:佢哋唔會喺出面搞搞震!

加拿大讀書的 Toby梁靖琪,鬼妹仔性格,甚有異性緣,拍劇總會跟男對手傳緋聞; 10年拍《團圓》時與當時仍和傅穎拍拖的羅仲謙、 07年拍《歲月風雲》和去年拍《衝上雲霄 II》再與吳卓羲傳緋聞,到三亞拍完外景,晚上眾演員落酒店泳池, Toby和吳卓羲又攬又摸玩到癲,全程被多本雜誌影曬。雖然事後 Toby唔認玩出火,老公黃敏豪亦到機場接機,但之後已甚少見到兩公婆一齊現身。

人妻 Toby同吳卓羲又攬又擒,仲上曬多本雜誌封面,又難怪老爺唔高興喎!《忽然 1周》圖片

《忽然 1周》圖片

Toby同黃敏豪 11年 12月結婚,當日擺酒吳卓羲都有到場,估唔到咁快玩完。

飯局哭爆婚變

上週三年廿九( 29日),本刊發現 Toby與 TVB高層父親梁家樹、母親蕭笑鳴( TVB前高層芭姐)、家姐、姐夫一家坐七人車,由清水灣梁家樹大宅出發,到九龍城食團年飯。當日梁家非常齊人,獨欠 Toby老公黃敏豪,單拖出席的 Toby黐實父親,又同一名男親友去附近買乳酪邊行邊食。食足兩粒鐘, Toby一家再原車返回清水灣,而 Toby亦一直留守娘家,沒有返回與老公位於牛池灣峻弦的愛巢。直至年初二, Toby在微博上載一張全家福,亦不見黃敏豪出現。

「上個月中有個飯局,成班 friend帶埋小朋友出嚟 gathering,玩得好哋哋,點知 Toby無端端坐喺度喊,大家都唔知發生咩事!後尾有人話 Toby離咗婚,呢排心情好差仲未平復到!」知情人士透露。

家人陪到實

梁家樹驚 Toby提起傷心事,專登陪住愛女接受訪問。

Toby媽媽芭姐(蕭笑鳴)亦樂於回答記者問題,強調 Toby不是會出去搞搞震的人。

29/1

Toby同屋企人一齊由外家出發到九龍城食團年飯,獨欠老公黃敏豪。

31/1

大年初一影全家福, Toby和胞姊和兩位姨甥笑曬,老公繼續冇影。

網上圖片

Toby︰我哋和平分手

本週一年初四,下午三時半, Toby與家人從娘家到九龍城食魚蛋粉, Toby胞姊梁家宜看到有記者,即轉身入餐廳。其後 Toby父親梁家樹步出餐廳,對女兒離婚一事,他直認︰「唔夾咪分開,性格有啲唔夾。(係唔係因為吳卓羲之前嘅報道?)唔係,佢哋只係小朋友,兩個都有問題,希望可以冷靜啲處理。(分開咗幾耐?)半年,離婚搞緊,我講曬喇,唔好騷擾佢( Toby)喇!」

經過一小時, Toby終於步出餐廳,她企定定回應,期間眼泛淚光,多次重複「好可惜」,「我哋和平分手嘅,好可惜……不過我哋仲係好朋友,喺家係分居……好可惜!婚姻嘅嘢梗有喊過!(搬返屋企?)係,已經一段時間,我仲學緊放開,好彩有新劇開。(緋聞搞到離婚?)唔關事。(計贍養費?)咩都唔要!」

而 Toby母親蕭笑鳴芭姐就比較大反應,「你哋喺邊度聽返嚟㗎?分居啫! Aaron好好,我哋關係好好,過時過節佢都有打畀我!總之 Aaron唔會喺出面搞搞震、 Toby亦唔會喺出面搞搞震。」

29/1

團年冇老公

一家大細食團年飯, Toby全程單拖,黐實父親梁家樹食 yogurt。

離婚再拍劇集

短婚年半就要離婚,據知 Toby身邊班老死好似佘詩曼、洪天明、姚樂怡等都有幫手箍煲,可惜都係失敗收場。「 Aaron(黃敏豪)屋企人好要面,始終都係大家族, Toby婚後都好多新聞,男家梗係唔多鍾意啦! Aaron提出離婚之後, Toby奈何都要答應,但協議暫時唔公開,為免同吳卓羲上次單新聞扯上關係。」

家事有排煩,好在 Toby近期要拍《使徒行者》,可以分嚇心之餘,同劇仲有好姊妹佘詩曼聽佢訴苦。不過 Toby父親,無綫戲劇部總監梁家樹將於 4月離職,調往邵氏電影部任高級顧問。冇咗個大靠山, Toby真係要靠班兄弟姊妹喇!

最後蜜照

Toby公開喺微博同老公嘅 sweet合照,已經係 12年 6月嘅事,即泳池嬉春事件 3個月前。

網上圖片

近排忙住拍新劇《使徒行者》, Toby唔使日日屈喺屋企喊咁陰功。

網上圖片

07年拍《歲月風雲》時, Toby(前)同吳卓羲已經玩得好埋。

圖片

Toby郵票多

爛玩爛蒲的 Toby,除了同吳卓羲玩得埋,婚前亦同唔少一齊拍劇的男藝員傳過緋聞,老中青都有,本郵票簿好厚!

羅仲謙

有傳 Toby 4年前拍《團圓》時,與謙仔因一場激咀戲撻著,背住傅穎拍了幾個月散拖。

黃宗澤

09年拍《摘星之旅》,有傳劇中飾演夫婦的兩人日久生情,更以「老公」「老婆」相稱,激嬲胡杏兒, Bosco事後要同杏兒去沖繩箍煲。

苗僑偉

07年到寧波拍新劇《歲月風雲》,有傳三哥趁老婆唔喺身邊同戲中女兒出雙入對,更十指緊扣深宵漫步。

2億家底 富二代老公唱過歌

Toby老爺黃振聲旗下有多間公司,業務包括投資、製衣及飼料生意。而黃家名下亦有多個物業,資產遍布港九新界,在元朗更擁有地皮,物業市值已逾 2億,而 Toby夫婦住緊的過千呎豪宅峻弦(小圖)亦屬黃家擁有。

至於 Toby老公黃敏豪, 97年曾奪溫哥華新秀歌唱大賽亞軍,更當上創作歌手, 04年被陳淑芬睇中; 05年有份演出《雪狼湖》; 06年又於張國榮離世 3周年紀念晚會中,獻唱親自作曲的〈煙花燙〉。但後來被父親反對入行,惟有專心幫手打理家族生意。

當年被陳淑芬睇中的黃敏豪(左),有份同張學友、陳潔儀一齊參演《雪狼湖》。《蘋果日報》圖片

外形唔錯的 Aaron,曾經同薛凱琪傳緋聞。《忽然 1周》圖片

《蘋果日報》圖片



鍾意就快D Share啦!