全城熱爆的娛樂八封新聞 & 時事趣聞 & 生活 + 趣聞
一家人食完午飯，邱淑貞行最頭，大女沈月（左一）孖住朋友仔跟實，同媽咪餅印一樣。
呢輪林狗開騷，報章雜誌講佢之餘又點會放過佢同彭羚嘅 14歲大女林泳？不過 FBI就話息影女星入面， 45歲邱淑貞個大女沈月其實仲有星味。
早前 FBI就喺銅鑼灣金雀餐廳，發現邱淑貞同老公沈嘉偉、大女沈月、沈月朋友及細女沈星食午飯。帶埋朋友仔一齊去開餐嘅沈月完全有曬媽咪嘅優良遺傳，白滑皮膚加埋精致五官相當上鏡， 13歲已經同媽咪差唔多高（邱淑貞身高 5呎 6吋），年紀細細應該仲有排高。睇嚟好快會高過嗲哋媽咪，唔入行嘥咗啲喎。
雖然只有 13歲，不過驟眼睇沈月已經同媽咪邱淑貞差唔多高。
老豆沈嘉偉就負責照顧只有 3歲嘅細女沈星，沈星眼大大個樣勁可愛，面形又係似足媽咪， 10年後可能又同邱淑貞一個餅印。
沈月唔單只腳長長，仲深得父母遺傳甚有品味，簡簡單單已著出星味。
